ब्याहा जुल प्रियंका व निकया

बलिउड अभिनेत्री प्रियंका चोपडां इन्टरनेशनल पप स्टार निक जोन्स लिसे ब्याहा याःगु दु । शनिवाः क्याथलोकि रितिरिवाज कथं ब्याहा जूगु खःसा आइतवाः हाकनं हिन्दी रितिरिवाज कथं ब्याहा जुइगु खँ धाःगु दु ।

क्याथलोलिक रितिरिवाज कथं ब्याहा यायेगु झ्वलय् निकया किजा केविन जोन्स व प्रियंकाया किजा सिद्धार्थ गु्रम्समेन कथं च्वंगु खःसा इशा अम्बानी अर्पिता खान शर्मा व परिणीति चोडपा ब्राइड्समेड कथं च्वंगु खः । निकया अबु पाल केविन जोन्सं हे प्रियंकाया मदयेधुंकूम्ह अबु अशोक चोपडाया भूमिका म्हिताः प्रियंकाया ल्हाः निकयात लःल्हानाबिउगु खः ।
प्रियंका व निकया ब्याहा ज्याझ्वः राजस्थानया लोकंह्वाःगु पर्यटकीय थाय् जोधपुरया उम्मेद भवन प्यालेसय् जुयाच्वंगु दु । थन प्रियंका व निकया

छुं छुं सतीपिं पासापिं व छेँजःपिनि जक उपस्थितिइ ब्याहा जूगु खः ।
ब्याहा जूथाय् कडा सुरक्षा व्यवस्था यानातःगु दु । अन सुयातं मोबाइल फोन तकं यंकेत अनुमति बियातःगु मदु । अथे जूगुलिं प्रियंकाया ब्याहाया तस्बिर मिडियाय् पिहां मवःनि । तर प्रियंकां हे थःगु ‘मेहन्दी’ ज्याझ्वःया तस्बिर थःगु इस्टाग्राम पाखें सार्वजनिक याःगु दु ।