देउवायात सर्वोच्चं हे प्रम दयेकेमाः

येँ – संसद विघटनयात कयाः सर्वोच्च अदातलय् म्हिगः नं निरन्तर सुनुवाइ जुल । म्हिगः सर्वोच्च अदालतय् वहस यायेगु झ्वलय् वरिष्ठ अधिवक्ता सतीशकृष्ण खरेलं आः संवैधानिक अदालतं संसद पुनस्र्थापना यानां जक मगाः धासें कांग्रेसया सभापति शेरबहादुर देउवायात प्रधानमन्त्री नियुक्ति यायेत आदेश तकं बीमाःगु दावी यानादिल । वय्कलं सभापति देउवां बहुमत सांसदया हस्ताक्षर सहित राष्ट्रपति समक्ष दावी याःगुलिं देउवायात प्रधानमन्त्री नियुक्ति यायेत आदेश बीमाःगु खँ धयादीगु खः ।

वय्कलं धयादिल, ‘आदेश जारी यायेबलय् प्रतिनिधिसभा पुनस्र्थापना यानाः ल्यं दनिगु ज्या संसदय् जुइ धकाः धयां जक मजिउ, आः तक बहुमत कायम जुयाच्वंम्ह देवायात प्रधानमन्त्री नियुक्तिया आदेश वयेमाः व थ्व अनिवार्य खः, छाय्धाःसां प्रम ओली पटक पटक संवैधानिक दायरा हाचां गायेधुंकल ।’

उकथं हे वय्कलं धारा ७६ (५) कथंया सरकार नीस्वनेत राष्ट्रपतिं थःगु संवैधानिक दायित्व पूमवंकू धासें राष्ट्रपतिं नं थःत सुधार यायेमाःगु सुझाव बियादिल । उकथं हे वय्कलं प्रधानमन्त्री नियुक्त यायेगु निंतिं दलं मखुसें सांसदपिंसं व्यक्तिगत रुपं मत बीमाःगु जिकिर यासें धयादिल, ‘मत धइगु सांसदतय्सं बीगु खः, ७६ (२) जुइमा वा मेगु हे जुइमा, मखुसा विश्वासया मतय् छाय् मत विभाजन याइ, दलया नेतां विश्वास बिउसा जि हे जिल नि ।’

सांसदतय्सं ह्वीप उल्लंघन यानाः बिउगु मत नं मान्यता दइ धासें वय्कलं न्ह्यःने धयादिल, ‘ह्वीप उल्लंघन यानाः बिउगु मतया मान्यता दइ मखु धकाः विश्वया गुगुं नं संविधानय् च्वयातःगु मदु, ह्वीप उल्लंघन यानाः बिउगु मतं मान्यता काःगु आपालं उदाहरण दु ।’

उकथं हे संविधानविद् भीमार्जुन आचार्यं प्रधानमन्त्री केपी ओलीं संसदय् उपस्थित जुयाः विश्वासया मत मकाःतले मेगु सरकार गठनया प्रक्रिया हे न्ह्याये मफइगु दावी यानादिल । प्रम ओलीं विश्वासया मत कायेमाःगु बाध्यात्मक व्यवस्था खः धासें वय्कलं विश्वासया मत काये मफुत धाःसा जक मेगु सरकार नीस्वने फइ धयादिल । वय्कलं धयादिल, ‘७६ (४) या प्रक्रिया पूमवंकुसे ७६ (५) या प्रक्रिया न्ह्याइ मखु ।’

उकथं हे वय्कलं संविधानया धारा ७६ (५) कथं प्रधानमन्त्रीयात समर्थन यायेबलय् सांसदपिंत कारबाही मजुइगु खँ धासें धारा ७६ (५) या प्रधानमन्त्रीयात समर्थन यायेबलय् राजनीतिक दल सम्बन्धी ऐन आकर्षित मजुइगु खँ कनादिल ।
संविधानविद् आचार्यं दल त्याग यायेत राजीनामा बिउसा, मेगु पार्टीइ दुहां वंसा, मेगु पार्टी गठन याःसा व संसदीय दलया ह्वीप उल्लंघन यात धाःसा जक दल त्यागया ऐन आकर्षित जुइ, मखुसा दल त्याग याःगु माने याइमखु धासें छगू हे कार्यकालय् छम्ह हे मनू फुक्कं धारा कथं प्रधानमन्त्री जुइ मजिउगु खँ नं धयादिल ।

अथे हे वरिष्ठ अधिवक्ता सविता भण्डारीं धारा ७६ (५) कथं प्रधानमन्त्री नियुक्त यायेत राष्ट्रपति समक्ष शेरबहादुर देउवां पेश याःगु आधार वैधानिक जूगुलिं वय्कःयात प्रधानमन्त्री नियुक्त याये माःगु तर्क यानादिल । वय्कलं प्रम ओलीयात संसद विघटनया सिफारिस यायेगु अधिकार मदु धासें धयादिल, ‘धारा ७६ (५) या सरकार मदयेकुसे संसद विघटन जुइमखु ।’

वंगु वैशाख २७ गते विश्वासया मत कायेत संसदय् वंम्ह प्रधानमन्त्री ओलीं विश्वासया मत काये मफयेवं पद मुक्त जुइधुंकूगु खः । वयां लिपा राष्ट्रपति विद्यादेवी भण्डारीं संविधानया धारा ७६ (२) कथं बहुमतया सरकार दयेके मफयेवं धारा ७६ (३) कथं संसदया तःधंगु दलया ल्याखं वैशाख ३० गते ओलीयात हे प्रधानमन्त्री नियुक्त याःगु खः ।

थ्वहे झ्वलय् संसद विघटन सम्बन्धी रिट निवेदक पक्षं वहस यायेगु ई म्हिगः क्वचाःगु दु । आः विपक्षीयात बिउगु झिंन्याघौया वहस शुरु जुइ । म्हिगः रिट निवेदक पक्षया वहस क्वचायेवं विपक्षीपाखें वहस यासें महान्यायाधिवक्ता रमेश बडालं प्रधानमन्त्री, राष्ट्रपति व सभामुख रिट निवेदनया विपक्षी जूसां नं रिट निवेदकया पक्षय् गतिविधि यानाच्वंगु धासें थःगु पक्षयात क्वःछिनातःगु ई स्वयां सभामुखया पक्षयात अप्वः ई बी मफइगुलिं सभामुखं फ्वंगु स्वघौया ई बी मफइगु खँ धयादिल । वय्कलं सभामुखया पक्षयात छघौ जक ई बी फइ धायेवं न्यायाधीश ईश्वर खतिवडां थःपिनिगुपाखें बाघौ थप यायेगु जानकारी महान्यायाधिवक्तायात यानादीगु खः ।

सम्बन्धित बुखँ

LEAVE YOUR COMMENTS