मू विवाद राजधानी चीकेगु
राजधानी विवादं हे स्थापितयात बर्खास्त याःगु दावी
येँ – प्रदेश नं. ३ या भौतिक पूर्वाधार मन्त्री केशव स्थापितयात प्रदेशया मुख्यमन्त्री डोरमणि पौडेलं बर्खास्त याना छ्वःगु घटनां देय्या राजनीति छुं ई तरंगित जुल । स्थापितयात बर्खास्त याना छ्वःगुया कारण वय्कलं मुख्यमन्त्री पौडेलयात ‘दुव्र्यवहार याःगु’ धकाः जक न्ह्यथंगु दु । तर धाथें याःगु चाहिँ छु खः ले धइगु खँ धाःसा सार्वजनिक जूगु मदुनि ।
सूत्रतय्सं धाः कथं मुख्यमन्त्री पौडेलं मन्त्री स्थापितयात पदं हे बर्खास्त याना छ्वःगुया मू कारण धाःसा थ्व मखु । थुकिया लिउने प्रदेश ३ या स्थायी राजधानी गन तयेगु धकाः जुयाच्वंगु विवाद मू रुपं सुलाच्वंगु दु । थौंकन्हय् हेटौंडाय् तयातःगु प्रदेश ३ या स्थायी राजधानी अनं चीकाः मेथाय् सारे यायेमाः धकाः दकलय् सक्रिय रुपं सनाच्वंम्ह केशव स्थापित हे खः । वय्कलं हेटौंडाय् राजधानी कायम जुइगु व्यवहारिक मजूगु कारणं अनं सारे याये हे माः धकाः लबिङ यायेगु ज्या यानाच्वनादीगु खः ।
स्थापितया थ्व लबिङ मुख्यमन्त्री पौडेलयात धाःसा मयःगु जुयाच्वन । वय्कः थः हे हेटौंडानिवासी जूगु कारणं राजधानी हेटौंडाय् हे तयेमाः धइगु पक्षय् वय्कः दी । नापं थः मुख्यमन्त्री जुयाच्वंगु हे इलय् यदि राजधानी अनं मेथाय् सारे यात धाःसा थःगु राजनीतिक भविष्य समाप्त जुइगु जुयाः राजधानी हेटौंडाय् हे कायम याकेगु कुतः यानाच्वनादीगु दु ।
विज्ञ सूत्रं धाः कथं राजधानी सारे यायेगु खँय् पौडेल व स्थापित दथुइ तःधंगु तनाव ब्वलनाच्वंगु दु । उकिं स्थापितयात पदं हे चीका छ्वत धाःसा राजधानी सारे यायेमाः धाइपिनिगु सः छुं भचा कम जुइ धइगु तायेकाः वय्कलं मौका लुइसातकि स्थापितयात पदं हे चीका छ्वःगु सूत्रया दावी दु ।
हेटौंडाय् प्रदेशया स्थायी राजधानी तयेगु निर्णय कांग्रेसया शेरबहादुर देउवां सरकारं याःगु खः । उकिं नेपाली कांग्रेसया फुक्कं सांसदत राजधानी हेटौंडाय् हे तयेमाः धइगु पक्षय् दु । नापं मकवानपुर लगायत चितवन व धादिङया नेकपा सांसदत नं राजधानी हेटौंडाय् तयेमाःगु खँय् सहमत दु । उकिं छुं जुयाः स्थायी राजधानी गन तयेगु धइगु खँय् सदनय् मतदान जुल धाःसा सारे यायेमाः धइगु पक्षय् दुई तिहाइ मत वइगु सम्भावना मदु । गबले तक दुई तिहाइ मत प्राप्त जुइ मखु अबले तक राजधानी नं सारे याये फइ मखु, थ्व हेटौंडाय् हे कायम जुयाच्वनी ।
थ्वहे दथुइ नेपाली कांग्रेस मकवानपुर जिल्ला समितिं राजधानी हेटौंडां सारे यानाः मेथाय् यंकल धाःसा तःधंगु आन्दोलन यायेगु जुइ धकाः ख्याच्वः बिया हःगु दु ।
LEAVE YOUR COMMENTS