एमसीसी हयेत सभामुखया स्वंगू शर्त

येँ – सभामुख अग्निप्रसाद सापकोटां एमसीसी सम्झौता संसदय् न्ह्यःने न्ह्याकेगु नितिं स्वंगू सर्त तःगु दु । सरकारं सत्तारुढ गठबन्धन दल व संसदय् प्रतिनिधित्व याइगु दलतय् दथुइ एमसीसी पारित यायेगु नितिं सर्वदलीय बैठक यायेवं वय्कलं उगु सर्त तयादीगु खँ सीदुगु दु ।

सभामुख सापकोटां एमसीसी सम्झौता न्ह्यःने न्ह्याकेगु नितिं राष्ट्रिय सहमति जुइमाःगु, एमसीसीयात कयाः जनतां फ्वनाच्वंगु न्ह्यसःया लिसः बीमाःगु, संसदय् एमालें थनाच्वंगु पंगः चीकेमाःगु सर्त तःगु खः । सभामुख सापकोटां सचिवालयया पदाधिकारीपिं लिसे खँ ल्हायेगु झ्वलय् संसद अवरुद्ध जुयाच्वंगु व राष्ट्रिय सहमति मजुइगु अवस्थाय् एमसीसी न्ह्यःने यंकेत थःत थाकुइगु खँ धायेगु यानाच्वंगु दु ।
उकथं हे सभामुख सापकोटां संसदय् पंगः ब्वलनाच्वंगु इलय् गुगु नं कथंया राष्ट्रिय महत्वया विषय न्ह्यःने यंकेत थःत असहज जुइगु खँ थः सतिपिं लिसे धायेगु यानाच्वंगु दु ।

सभामुख सापकोटां थःसतिपिं लिसे खँ ल्हायेगु झ्वलय् एमसीसी न्ह्यःने यंकेगु खःसा प्रक्रियागत रुपं न्ह्याः वनेमाःगु, जनतां थंगु न्ह्यसः स्पष्ट लिसः बीमाःगु धासें जनतां ल्ह्वंगु न्ह्यसःया लिसः बीत राजनीतिक दलत छाय् लिचिला च्वन धकाः न्ह्यसः तयेगु यानाच्वनादीगु दु ।

सभामुख सापकोटां यानाच्वंगु् दु, ‘थुलि तःधंगु विषयया छलफल जुइगु इलय् प्रमुख प्रतिपक्षं नारा थ्वयेकाच्वनीगु व जिं जिउ धाइपिसं जिउ धाः, मजिउ धाइपिसं मजिउ धाः धकाः धायेला मिले मजुल नि ।’

उकथं हे एमसीसीयात कयाः सत्तारुढ दलतय् दथुइ नं छगू हे मत मदु । माओवादी केन्द्र व एकीकृत समाजवादी पार्टी अझ नं यथास्थितिइ एमसीसी पारित जुइ मफुइगु खँ धयाच्वंगु दु ।
एमसीसी पारित यायेगु नितिं म्हिगः सरकारं सःतूगु सर्वदलीय बैठकय् नं थीथी राजनीतिक पार्टीया नेतातय्संं एमसीसी सम्झौतायात कयाः थीथी दफाय् ब्वलनाच्वंगु न्ह्यसःया लिसः मवयेकं एमसीसी सदनय् न्ह्यब्वये मफइगु खँ धाःगु खः ।

म्हिगःया सर्वदलीय बैठकय् कांग्रेसया रामचन्द्र पौडेल, उपसभापति पूर्णबहादुर खड्का, महामन्त्री गगन थापा, पुलांम्ह सहमहामन्त्री रामशरण महत, कानुन मन्त्री ज्ञानेन्द्र बहादुर कार्की, माओवादी अध्यक्ष पुष्पकमल दाहाल व नारायणकाजी श्रेष्ठ, जनता समाजवादी पाखे संघीय परिषदया अध्यक्ष डा. बाबुराम भट्टराई व अध्यक्ष उपेन्द्र यादवपिंसं ब्वति काःगु खः ।

उकथं हे नेकपा एकीकृत समाजवादीया वरिष्ठ नेता झलनाथ खनाल व महासचिव बेदुराम भुसाल, लोकतान्त्रिक समाजवादी पार्टीया अध्यक्ष महन्थ ठाकुर व सर्वेन्द्रनाथ शुक्ल, राष्ट्रिय जनमोर्चाया महासचिव मनोज भट्ट व नेमकिपाया महासचिव प्रेम सुवालपिंसं ब्वति काःगु खः । बैठकय् प्रमुख प्रतिपक्षी दल एमालें धाःसा ब्वति मकाल । एमालें थःपिंसं कारबाही यानातयापिं सांसदपिंत सभामुखं कारबाही मयाःतले संसदय् पंगः थनेगु निसें सरकारं सःतीगु सहलह ज्याझ्वलय् ब्वति मकायेगु अडान कया वयाच्वंगु दु ।

सम्बन्धित बुखँ

LEAVE YOUR COMMENTS