उपेन्द्र यादवपाखें पार्टीया दावी

येँ – जनता समाजवादी पार्टीया अध्यक्ष उपेन्द्र यादव व संघीय परिषद्या अध्यक्ष डा. बाबुराम भट्टराईं म्हिगः निर्वाचन आयोगय् वनाः पार्टीया आधिकारिता दावी यानादीगु दु । वय्कःपिंसं बहुमत सदस्यतय्गु हस्ताक्षर सहित पार्टीया आधिकारिकता दावी यानादीगु खः ।

अध्यक्ष यादवया नेतृत्वय् वंगु पार्टीया पुचलं आयोगयात सुइम्ह केन्द्रीय दुजःतय् हस्ताक्षर पेश याःगु खः । आयोगं राजनीतिक दलसम्बन्धी दफा ५१ कथं विवरण अध्यावधिक यायेत अस्वीकार यायेवं जसपां दफा ४२ व ४४ कथं आधिकारिकता दावी याःगु खः ।

आयोगय् अध्यक्ष यादव लिसें अशोक राई, राजेन्द्र श्रेष्ठ, लालबहादुर राउतपिं नं उपस्थित जुयादीगु खः । जसपाया वंगु बिहिवाः च्वंगु केन्द्रीय कार्यकारिणी समितिया बैठकं आधिकारिकता दावी यायेत आयोगय् वनेगु निर्णय याःगु खः ।

मेखे जसपाया मेम्ह अध्यक्ष महन्थ ठाकुरं नं निर्वाचन आयोगय् वनाः पार्टीया आधिकारिकता दावी यायेगु तयारी यानाच्वंगु खँ सीदुगु दु । ठाकुरं आधिकारिकता दावी यायेगु निंतिं छुं न्हि न्ह्यः जक केन्द्रीय कार्यकारिणी समितिइ २० म्ह थःगु पक्षया दुजःत थपे याःगु खः । जसपाया कार्यकारिणी समितिइ ठाकुर पक्ष अल्पमतय् लानाच्वंगु दु । थ्व स्वयां न्ह्यः जसपाय् छगू पक्षं मेगु पक्षयात कारबाही यायेगु ज्या जुयाच्वंगु खः ।

ठाकुर पक्ष प्रधानमन्त्री केपी ओलीया सरकारय् समावेश जुइवं यादव पक्षया खँयात निर्वाचन आयोगं वेवास्ता यात धासें यादव पक्षं निर्वाचन आयोगप्रति खेद प्वंका वयाच्वंगु दु ।