ने. सं. ११४४ कछलागा सप्तमी -

सांसद बस्नेत ख्वपय् रंगशाला दयेकेगु खँय् अडिग

ख्वप – नेकपाया नेतालिसें प्रतिनिधिसभा सदस्य महेश बस्नेतं ख्वपय् अन्तर्राष्ट्रियस्तरया रंगशाला दयेकेगु निंतिं न्ह्यानाच्वंगु कुतः जारी हे जुइ धयादीगु दु । लिपांगु इलय् ख्वपय् अन्तर्राष्ट्रिय रंगशाला दयेकेगु विषययात कयाः विरोध जुयाच्वंगु इलय् वय्कलं उगु खँ तयादीगु खः ।सांसद बस्नेतं अन्तर्राष्ट्रियस्तरया रंगशाला ख्वपय् हे दयेकाः त्वःतेगु प्रतिवद्धता नं प्वंकादीगु दु ।

वंगु वालय् जिल्ला समन्वय समितिं ग्वसाः ग्वःगु छगू ज्याझ्वलय् नवासें सांसद बस्नेतं उगु प्रतिवद्धता प्वंकादीगु खः । पुलांम्ह उद्योगमन्त्री तकं जुयादी धुंकूम्ह बस्नेटं विकास व समृद्धिया निंतिं दक्वं पूर्वाधार निर्माण यायेगु, शिक्षा, स्वास्थ्यय् पहुँच दयेकेगु अभियानय् थःपिं न्ह्याः वनाच्वनागु धासें विकासया विरोधीतय्त लिउने लाकाः ख्वप देय्यात नमूना जिल्ला दयेकेगु दावी यानादिल ।

अन्तर्राष्ट्रिय रंगशाला व कभर्ड हल दयेकेत प्रक्रिया तकं न्ह्यायेधुंकूगु धासें वय्कलं दक्वं नगरपालिकाय् पक्की सतकया विस्तार यायेगु, धार्मिक पर्यटकीय गन्तव्यया विकास, दक्वं खुसिइ ताँ दयेकेगु निंतिं प्रक्रिया न्ह्याः वनाच्वंगु धयादिल ।

जिल्ला समन्वय समितियात अधिकार सम्पन्न यानाः न्ह्यःने यंकेमाःगु खँय् नं वय्कलं बः बियादीगु खः । ज्याझ्वलय् प्रदेशसभा सदस्य शशीजंग थापा, सूर्यविनायक नगरपालिका प्रमुख वासुदेव थापालगायतं दक्वं दल व दक्व पक्ष मिले जुयाः न्ह्यः वनेमाःगु खँय् बः बियादीगु खः ।