
येँ – एसइइ परीक्षाय् म्हो ग्रेड हःपिं विद्यार्थीतय्सं शिक्षा संकाय अध्ययन याये खनीगु सम्भावना ब्वलंगु दु । सरकारं एसइइ परीक्षाय् म्हो ग्रेड हःपिं विद्यार्थीं शिक्षा संकायय् भर्ना जुइ दइगु नीतियात पुनःविचार याइगु जूगु दु । शिक्षा, विज्ञान व प्रविधिमन्त्री गिरिराजमणि पोखरेलं एसइइ परीक्षाय् म्हो ग्रेड वःपिं विद्यार्थीयात शिक्षा संकायय् भर्ना यायेगु नीतियात कयाः पुनःविचार यायेमाःगु अवस्था वःगु खँ धयादीगु दु ।
सिरहाया मिर्चैयाय् जूगु छगू ज्याझ्वलय् नवासें मन्त्री पोखरेलं एसइइ परीक्षाय् म्हो ग्रेड वःसां शिक्षा संकाय ब्वने दइगु व्यवस्थाया कारणं शैक्षिक गुणस्तरीयता हे कुहां वनाच्वंगुलिं थुकी विचाः यायेमाःगु आवश्यक जूगु खँ धयादीगु दु ।
वय्कलं शिक्षा प्राविधिक व सीपमूलक जुइमाःगु खँय् बः बियादिसें सामुदायिक विद्यालययात प्राथमिकताय् तयाः शैक्षिक गुणस्तर वृद्धिया निंतिं सामुदायिक विद्यालयय् रुपान्तरणसम्बन्धी कार्य योजना दयेकाः न्ह्यःने यंकेगु नं धयादीगु दु ।
LEAVE YOUR COMMENTS