निख्खर हाकुम्ह सल, तुइसे च्वना वल
छि बजारः वनीगु इलय् छुं छता ज्वलं छितः तसकं यल धाःसा शायद छिं न्ह्याक्व हे मू पुलेमाःसां तयार जुयादी ! तर छक्वः विचाः यानादिसँ । छिं तसकं हे थिकेक मू पुलाः हःगु व सामान लिपा जिलं वन व उकिया रंग ब्वया वन वा उकिया चमक हे मदया वन धाःसा छितः गथे जुइ ?
छकः विचाः यानादिसँ लखौं तका पुलाः न्याना हःम्ह सलया रंग नं अथे हे ब्वया वन व वयागु म्हया रंग हे हिला वन धाःसा उम्ह मनूयात छु जुल जुइ । खँ भारतया पंजाब राज्यया खः । फरिदकोट धइगु थासय् च्वंम्ह छम्ह करनबीर इन्टर सिंह नांया मनुखं १७ लाख भारु (नीन्यागू लाख) तका पुलाः छम्ह स्थानीय व्यापारीयाके वं थःत यःम्ह सल न्यानाहल ।
सल व्यापारीया दावीकथं करनवीरं न्यानाहःम्ह सल तसकं निख्खर हाकुम्ह भिंगु जातया मारवाडी नश्लयाम्ह खः । तर तसकं भिंगु जातयाम्ह धयातःम्ह उम्ह सल न्यानाहःगु छुं दिं लिपा हे वयागु म्हया रंग ब्वया वनेगु शुरु जुल । थःत यःम्ह जूगुलिं करनवीरं नं उम्ह सलया सुसाःकुसाः यायेगुलिइ छुं हे कसर ल्यं मतः ।
तर दिं वंलिसे व सलया म्हय् तुयुगु चातः खने दया वःगु जक मखसे सँ नं तुइसे च्वना वल । दिं वंलिसे तसकं निख्खर हाकुम्ह सल छुं लिपा ला दुरु थें तुइसे च्वना वल । सलया म्हया रंग हिला वनाः तुइसे च्वना वयेवं करनवीरं सल व्यापारी मेवा सिंहलिसे खँ ल्हायेत कुतः याःसां वं छुं नं लिसः मबीवं करनवीरं उकियात कयाः प्रहरीइ उजुरी यात ।
छानविनया इलय् सल व्यापारी सिंहं तुयुम्ह सलयात रंग छिनाः हाकुम्ह दयेकूगु व हाकुम्ह मारवाडी नश्लया सलया मू यक्व वइगु जूगुलिं थम्हं अथे यानागु धाःगु दु । थुगु घटना लिपा प्रहरीं सल व्यापारी मेवा सिंह विरुद्ध फौजदारी अपराधया कानुनया धारा ४२० अन्तर्गत ठगी व जालसाजीया अभियोगय् मुद्दा दायर याःगु दु ।
LEAVE YOUR COMMENTS