ख्वपय् बन्ध्याकरण व रेबिज विरुद्ध खोप अभियान

येँ – ख्वपय् लाछिखिचातय् बन्ध्याकरण व रेबिज विरुद्ध खोप अभियान शुरु जूगु दु । ख्वप नगरपालिकां नगर क्षेत्र दुने लाछिखिचाया बन्ध्याकरण यायेगु व रेबिज विरुद्ध खोप अभियान संचालन याःगु खः । लँय् अथें त्वःता तःपिं खिचां न्यानाः छुंकथंया नं मानवीय क्षति मजुइमा धइगु ल्याखं उकथंया अभियान न्ह्याकूगु खः । तालिम प्राप्त पशुविज्ञ व नगरपालिकाया कर्मचारीतय् मंकाः पुचलं लाछिखिचायात ज्वनाः बन्ध्याकरण यायेगु व रेबिज विरुद्ध खोप बीगु अभियान न्ह्याका वयाच्वंगु खः ।

नगरप्रमुख सुनील प्रजापतिं ख्वप लाय्कू लागाय् अभियानया निरीक्षण यानादिल । स्थलगत निरीक्षण लिपा वय्कलं लाछिखिचातय्सं चान्हय् सुरक्षाया ज्या याइगु खःसां नगरय् लाछिखिचा अत्याधिक रुपं अप्वयेवं उकथंया अभियान न्ह्याकागु खः धयादीगु दु । वय्कलं असंख्य रुपं खने दुपिं खिचायात रेबिजं मुक्त यायेत व खिचाया ल्याः अनपेक्षित रुपं अप्वइगुपाखें पनेगु निंतिं बन्ध्याकरण व खोव अभियान न्ह्याकागु स्पष्ट यानादिल ।

अभियानय् दक्ष पशु चिकित्सक संलग्न जुयाच्वंगुलिं थ्व छगू सकारात्मक पहल जूगु धासें थ्व अभियानयात नगर दुनेया दक्वं वडाया त्वाः त्वालय् संचालन यायेगु नगर प्रमुख प्रजापतिं कनादिल । अभियानया संयोजकलिसें ३ वडाअध्यक्ष राजकृष्ण गोरां अभियानया झ्वलय् नियन्त्रणय् काःपिं खिचायात गःपलिइ च्वंगु पशु स्वास्थ्य क्लिनिकतय् यंकाः बन्ध्याकरण यायेगु व खोप बीगु ज्या जुयाच्वंगु जानकारी बियादीगु दु ।