च्याम्पियन्स लिग – लिभरपुलय् सलाहया ५० औं गोल

एजेन्सी- च्याम्पियन्स लिगया समूह ‘बी’ अन्तर्गत म्हिगः जूगु कासाय् स्पेनिस महारथि बार्सिलोनां इटलीया इन्टर मिलानयात बुकूगु दु ।
बार्सिलोनां थःगु समूहया स्वंगूगु कासा त्याकेगु झ्वलय् इन्टर मिलानयात २–० गोलं बुकूगु खः । बार्सिलोनां कासाया ३२ औं मिनेटय् लुइस स्वारेजया पासय् राफिन्हां याःगु गोलं अग्रता काःगु खः । आक्रमक कासा म्हितूगु बार्सिलोनाया निंतिं ८३ औं मिनेटय् जोर्डी अल्बां निगुगू गोल याःगु खः । ला लिगाय् सेभिल्ला नाप जूगु कासाय् ल्हाः त्वःधूगुलिं बार्साया स्टार कासामि मेसीं बेञ्चय् च्वनाः कासा स्वःगु खः । थ्व हे समूहया मेगु कासाय् टोटनह्याम व पिएसभी दथुया कासा २—२ गोलया बराबरीइ क्वचाल । आः बार्सिलोना ९ अंकसहित समूहया शीर्ष थासय् दु ।

म्हिगः हे एन्फिल्डय् जूगु कासाय् लिभरपुलं रेड स्टार बेलग्राडयात ४–० गोलं बुकल । समुह सी अन्तर्गत जूगु थ्व कासाय् लिभरपुलया निति मोहम्मद सलाहं निगू गोल, रोबर्टो फिर्मिनो व साडियो मानें छगू छगू गोल याःगु खः । लिभरपुलं न्हापांगु हाफय् निगू व लिपांगु हाफय् निगू गोल याःगु खः । कासा याःगु २० औं मिनेटय् फिर्मिनोया गोलया ग्वाहालिं लिभरपुलं अग्रता काःगु खः । न्हापांगु हाफया ४५ औं मिनेटय् सलाहं मेगु गोल यात । लिपांगु हाफया ५१ औं मिनेटय् सलाहं व्यक्तिगत निगूगु गोल यातसा ८० औं मिनेटय् साडियो मानें थप छगू गोल यायेवं लिभरपूल प्यंगू गोलं त्याःगु खः । थ्व कासाय् निगू गोल यानाः सलाहं लिभरपुलया निंतिं थःगु व्यक्तिगत ५० गोल पूवंगु दु ।

थ्वहे समूहया मेगु कासाय् पीएसजी व नेपोलीं २—२ गोलया या बराबरी म्हितूगु दु । नेपोलीया निंतिं इन्सिन्या व मार्टिन्सं गोल याःगु खः । नेपोलीया मारियो रुइं आत्मघाती गोल याःगु खः । छगू गोलं लिउने लानाच्वगु पीएसजीया निंतिं निगू हाफया इन्जुरी टाइमय् डि मारियां गोल याःगु खः ।

मेखे समूह ‘ए’य् एथ्लेटिको म्याड्रिड च्याम्पियन्स लिगया न्हापांगु कासा बूूगु दु । च्याम्पियन्स लिगया लगातार निगू कासा त्याःगु एथ्लेटिको स्वंगूगु कासाय् बोरुसिया डर्टमुन नाप ४—० गोलं पराजित जूगु खः । डर्टमनया निंतिं राफयल भरानं निगू, एक्लेस विटसल व जेडन सान्चाें छगू छगू गोल याःगु खः । समुहया मेगु कासाय् मोनाको व क्लब ब्रग दथुया कासा १—१ गोलया बराबरीइ क्वचाःगु दु । स्वंगू कासा त्याकाः बोरुसिया डर्टमन समूहया शीर्ष थासय् दु । अथेहे समुह ‘डी’इ जूगु कासाय् एफसी पोर्टो लोकोमोटिभ मस्कोयात ३–१ गोलं बुकल । शाल्के व गालाटासारें गोलरहित बराबरी म्हितल । एफसी पोर्टो समूहया शीर्ष थासय् दु ।

सम्बन्धित बुखँ

LEAVE YOUR COMMENTS