बसन्तपुली छन्हुं १३ लाख आम्दानी
येँ – बसन्तपुर दरवार लागाय् पर्यटक अप्वयेवं अनया आम्दानी नं अप्वःगु दु । म्हिगः मंगलवाः छन्हुं जक १३ लाख तका आम्दानी जूगु खँ बसन्तपुर दरवार क्षेत्र संरक्षण कार्यक्रमं धाःगु दु । थ्व आः तक दकलय् अप्वः छन्हुं आम्दानी जूगु ध्यबा खः । तःभुखाचय् लिपा पुनर्निर्माण जुयाच्वंगु इलय् पर्यटकया ल्याः अप्वयाः आम्दानी नं अप्वःगु खः ।
दरवार क्षेत्र चाःहिलेत वइपिं पर्यटकपाखें १३ लाख तका आम्दानी जूगु संरक्षण कार्यक्रमया प्रमुख उदयबहादुर पसःखलं जानकारी बियादीगु दु । वय्कःया कथं मेगु न्हिं न्हिथं १० लाख तका आम्दानी जुयाच्वंगु खः । म्हिगः जक सार्क राष्ट्रं वःपिं ८२ म्ह पर्यटक व मेमेगु थीथी देशं वःपिं १,२६९ म्ह पर्यटकपाखें उगु आम्दानी जूगु खः ।
थुगु क्षेत्रय् चाःहिलेत वइपिं पर्यटकपाखें सार्क राष्ट्रयात १५० तका व स्वंगूगु राष्ट्रया पर्यटकपाखें द्वःछि तका म्हयेगु यानाच्वंगु दु । दरवार क्षेत्र संरक्षण समितिं आः पर्यटकया ल्याः अप्वयेकाः न्हिं १५ लाख तका तक म्हयेगु योजना दयेकाच्वंगु दु । उकिया निंतिं सांस्कृतिक क्षेत्रया पुनर्निर्माणया ज्या तीव्र यायेगु ज्या न्ह्याकाच्वंगु दु ।
तःभुखाचं क्षति जूगु सम्पदा मध्ये आः तक गद्दी बैठकया पुनर्निर्माण यायेगु ज्या क्वचायेधुंकूगु दु । अथेहे गुतँ जाःगु दरवार व मरु सतः पुनर्निर्माण यायेगु चरणय् दु । उकथं हे कुमारी छेँ व माजु देगः नं पुनर्निर्माणया निंतिं ज्या न्ह्यानाच्वंगु खँ धाःगु दु । दरवार क्षेत्रय् लाःगु थीथी चिग्वःगु देगःत नं धमाधम पुनर्निर्माण यायेगु सम्पन्न जुजुं वयाच्वंगु दु ।
माजु देगः नं
पुनर्निर्माण तयारी
येँ – तःभुखाचं दुना वंगु बसन्तपुरया माजु देगः दयेकीगु जूगु दु । उकिया लागिं आवश्यक व्यवस्था जुइधुंकूगु खँ यँे मनपा हनुमानध्वाखा दरवार क्षेत्र संरक्षण कार्यक्रम प्रमुख उदय पसःखलं जानकारी बियादिल । आः सम्भव जुल धाःसा स्वन्ति न्ह्यः हे छगू साइत पिकयाः उकिया शिलान्यास यायेगु खँ नं वय्कलं कनादिल । ज्योतिषयात साइत स्वके बीधुनागु खँ नं वय्कलं कनादिल ।
LEAVE YOUR COMMENTS