३ नम्बर प्रदेशया राजधानी गन ?

येँ – ३ नम्बर प्रदेशया राजधानी बारे अध्ययन समितिं प्रतिवेदन लःल्हायेवं प्रदेशया राजधानीयात कयाः हानं चर्चा शुरु जूगु दु । हेटौंडाय् मोहनि नखःया झ्वलय् जूगु तुच्चा ज्याझ्वलय् सत्तापक्षया सांसद कुमारी मोक्तानं प्रदेशया राजधानी हेटौंडां पिने यंकेगु षडयन्त्र जुयाच्वंगु द्वपं बियादीगु खः ।

वय्कलं अन न्ववासें हेटौंडां राजधानी सारे यायेत चलखेल जुयाच्वंगु व उकियात न्ह्याथे यानाः नं पनेमाःगु खँ धयादीगु खः । वय्कलं राजधानी मकवानपुरय् कायम यायेगु निंतिं सकलें छप्पँ जुयाः न्ह्याः वनेमाःगु खँय् नं बः बियादिल ।

नेपाली कांग्रेस प्रदेश सभाया सांसद इन्द्रबहादुर बानियाँ प्रदेशया राजधानी हेटौंडां मेथाय् यंकेगु कुतः जुल धाःसा नाकाबन्दी यायेगु ख्याच्वः बियादिल । वय्कलं संघीयताया अभ्यास यायेगु धायेगु तर मेखे राजधानी छेँया न्ह्यःने तयेमाः धायेगु उचित मजू धासें हेटौंडायात हे स्थायी राजधानी दयेकेमाः धयादिल ।

येँय् राजधानी जुल धाःसा सुनां नं अपायक जुल धकाः धायेम्वाःगु, तर येँनं निघौ यात्रा यायेवं थ्यनीगु हेटौंडाय् राजधानी तयेगु झ्वलय् अपायक धायेगु उचित मजूगु तर्क वय्कलं कनादिल । मेखे राजधानी हेटौंडाय् हे तयेगु निंतिं नेपाली कांग्रेस व सत्तापक्षया सकलें सभासद्त छथाय् च्वनेगु कथं कार्यगत एकता यायेत मकवानपुरया सभासदपिं लगे जुयाच्वंगु दु ।

लिसें उमिसं राजधानी हेटौंडाय् तयेमाः धकाः थःपिनि पार्टीया वरिष्ठ नेतातय्त दवाव बीगु अभियान न्ह्याकेगु खँ नं धाःगु दु । उकिया निंतिं नेकपाया सांसदतय्सं नं तयारी यानाच्वंगु दु । छुं गथे जुयाः राजधानी बारे मतदान जुल धाःसा बहुमत खाके मबीगु तयारी नेकपाया सांसदतय्सं यानाच्वंगु खँ सीदुगु दु ।