निर्देशक बासु शाहीया ‘क्या फसाद’

यल – नेपालभाषा ख्यलय् दकलय् अप्वः संकिपा निर्देशन यानादीम्ह निर्देशक, च्वमि नापं कलाकार बासु शाहीं मेगु संकिपा ‘क्या फसाद’ निर्माण यानादीत्यंगु दु । थ्यंमथ्यं नीगू संकिपा निर्देशन यानादीधुंकूम्ह शाहीया न्हूगु संकिपाया शुभमूहर्त वंगु छुं दिं न्ह्यः थनया पूर्णचन्डीइ जूगु खः ।

शुभमुहूर्त ज्याझ्वलय् वरिष्ठ सिने पत्रकार विजयरत्न असंबरें नैंक्याः तछ्यानादीगु खःसा नेवाः एचडी टेलिभिजनया प्रमुख नवीन जोशीं क्यामराया स्वीच अन याादीगु खः । ज्याझ्वलय् मूपाहांकथं झायादीम्ह व्यवसायी ज्योतिरत्न वज्राचार्यं क्ल्याप बियादीगु खः । मूपाहां वज्राचार्यं त्वाःदेवाय् मत च्याकाः उलेज्या यानादीगु ज्याझ्वलय् निर्देशक शाहीया लिपांगु संकिपा ‘वाया दुने जाकि दु’या कलाकार, प्राविधिक, ग्वाहालिपि नापं पत्रकारतय्त मतिनाया चिं नं लःल्हाःगु खः ।

कल्प प्रोडक्सनया देछा संकिपा निर्माण न्यालाया दुने पूवंकेगु योजना दुगु निर्देशक शाहीं कनादिल । ज्याझ्वलय् मूपाहां, पाहां, प्रोडक्सनया नायःलिसें निर्देशक शाही, निर्मात्री मिञ्जु शाही लगायतं संकिपा निर्माणया थीथी पक्षयात कयाः थःथःगु नुगःखँ तयादीगु खः ।