राजधानी विवादं धनगढी बन्द

येँ – ७ नम्बर प्रदेशया राजधानी सम्बन्धी विवादयात कयाः म्हिगःनिसें अनिश्चितकालीन धनगढी बन्द याःगु दु । अनिश्चितकालीन बन्दया न्हापांगु न्हि म्हिगः बजाः पूवंक हे बन्द जूगु दु । बन्दकर्तातय्सं सुथंनिसें बजारय् माइकिङ यानाः बन्द सफल यायेत इनाप याःगु खः । म्हिगः शनिवाः सार्वजनिक विदा नं जूगुलिं बन्दं खास हे लिच्वः मलाकूगु खँ धाःगु दु ।

बन्दया झ्वलय् जुइफइगु छुं नं कथंया घटनायात नियन्त्रण यायेत सशस्त्र व नेपाल प्रहरीया पुचः थीथी थासय् परिचालन यानातःगु खः । प्रदेशसभाया शुक्रवाःया बैठकं प्रदेशया राजधानी गोदावरी नगरपालिकाया २ नम्बर वडाय् तयेगु निर्णय बहुमतं पारित याःगु खः । अथेहे प्रदेशया नां ‘सुदूरपश्चिम’ तयेगु निर्णय याःगु खः ।

शुक्रवाः जूगु मतदानय् नेपाली कांग्रेस व राजपां धाःसा ब्वति काःगु मदु । नेपाली कांग्रेसया स्थानीय नेता हरि रेग्मीं थःगु उपस्थिति मदुगु निर्णय थःपिंत मान्य जुइ मखु धाःगु दु । मतदान जुइगु इलय् कांग्रेस व राजपां बहिष्कार याःगु खः ।