स्वनिगलय् अझं बछिं मयाक सक्रिय संक्रमित

येँ (नेपालभाषा टाइम्स) – आइतवाः देय्न्यंकं थप २८१७ म्हेसिके कोरोना संक्रमण पुष्टि जूगु दु । स्वास्थ्य तथा जनसंख्या मन्त्रालयया कथं थुपिं मध्ये १५३३ म्ह स्वनिगलय् लाःगु दु । म्हिगः मुक्कं १२३११ गू नमूना पिसिआर परीक्षण याःगु खः । म्हिगः संक्रमित जूपिं मध्ये स्वनिगःया येँयापिं जक १२ ९४ म्ह लाःगु दु ।

अथेहे कोरोना संक्रमणया कारणं म्हिगः न्हिछिया दुने २१ म्हेसिया ज्यान वंगु दु । थुकिया लिसें नेपालय् कोरोनां सीपिनि ल्याः ११०८ म्ह थ्यंगु दु । नेपालय् आःतक कोरोना संक्रमण जूपिनि ल्याः १ लाख ९४ हजार ४०० स्वयां अप्व: थ्यंगु दुसा थुपिं मध्ये ८१.१ प्रतिशत संक्रमण मुक्त जुइधुंकूगु दु। थ्व ल्याखं आः देय्न्यंकं ३५ हजार ४१९ म्ह संक्रिय संक्रमितत दनिसा थुपिं मध्ये स्वनिगलय् जक बछि मल्याक १८ हजार ८५६ म्ह दु ।