‘कुमारी माजु रथय् बिज्याइबलय् गुबलें नं ग्याइ मखु’
थुगुसी येँयाःबलय् न्हूम्ह कुमारी माजु तृष्णा शाक्ययात न्हापांखुसी रथय् बिज्याकी । दछि न्ह्यः मोहनिबलय् कुमारी जुया बिज्याःम्ह वसपोलया न्हापांगु रथ यात्रायात कयाः कुमारी छेँया चिताइदार गौतम शाक्यलिसे जूगु बःचाहाकःगु खँल्हाबल्हा –
कुमारी माजु आः ग्वःदँय् च्वनाबिज्यानाच्वंगु दु ?
– वसपोल आः प्यदँय् च्वनाबिज्याःगु दु । पुलांम्ह कुमारी मतिना शाक्य झिंनिदँय् क्यंगुलिं थगुने मोहनिबलय् ओमबहाया तृष्णा शाक्ययात न्हूम्ह कुमारी कथं ल्यःगु खः ।
कुमारी माजु चिधिकःम्ह जूगुलिं थथे रथय् च्वनाबिज्याइबलय् ग्याइ मखुला ? न्हापा न्हापाया छिगु अनुभव छु दु ?
– कुमारी माजु थः हे छम्ह शक्तिया देवी खः । वसपोल गुबलें नं ग्याइ मखु । झीसं अथे धाये नं मजिउ । जिगु आःतकया अनुभव कथं कुमारी माजु गुबलें नं ग्याःगु धयागु मदु । वसपोल थः हे शक्तिया स्रोत जूगुलिं मचासां, तःधिकःसां गुबलें नं ग्याइ धयागु दइमखु ।
वसपोलया थुगुसी न्हापांखुसी रथयात्रा जुइत्यंगु दु, थज्याःबलय् छुं विशेष पुजा यायेमाःगु दु लाकि ?
– येँयाःया झ्वलय् कुमारी माजुयात रथय् बिज्याकीबलय् न्ह्याबलें गथे पुजा जुइगु खः, वसपोलयात नं अथे हे जक पुजा यानाः रथय् बिज्याकेगु जुइ । तर न्हूम्ह कुमारी जुलकि सरकारपाखें धाःसा बिस्कं हे छगू पुजा छ्वया हयेमाः । थुकिया बारे खँल्हाबल्हा जुयाच्वंगु दु ।
सरकारं धकाः गनं पुजा छ्वया हयेमाःगु खः, पुजा वइगु जुल लाकि मजूनि ?
– न्हापा जुजु दुबलय् दरबारं हे पुजा छ्वया हइगु खः । जुजु दुबलय् न्हूम्ह कुमारी हिल धायेवं दरबारं थःपिंसं हे स्वयाः पुजा छ्वयाहइ । जुजु मदयेधुंकाः आः थज्याःगु पुजा राष्ट्रपतिपाखें छ्वया हयेमाःगु खः । थुकिया बारे जिमिसं जानकारी बी धुनागु दु ।
संस्कृति मन्त्रालय व गुथि संस्थानयापिंसं थःपिंके थज्याःगु जानकारी मदु धयाः पौ छ्वयाहयेत धाःगुलिं पौ नं छ्वयाबी धुंगु दु । आः थ्व बारे राष्ट्रपति ज्याकुथिइ सहलह जुयाच्वंगु दु । वय्कःपिं सकारात्मक हे दु, छ्वया हइ जुइ ।
वसपोलयात गुकथं रथय् बिज्याकीगु जुइ ?
– रथय् बिज्याकेगु नं न्हापा लिपा गथे खः अथे हे जुइ, तर वसपोल चिधिकःनिगुलिं बुयाः हे रथय् यंकेगु जुइ । थौंकन्हय् फोटो काइपिंसं यानाः तसकं हुलहुल जुइगुलिं चिधिकःबलय् न्यासिके यंके तसकं थाकु । भचा तःधिकः जुलकि न्यासि यंकेगु नं जुइ ।
सरकार व नगरपालिकापाखें येँयाः जात्राया निंतिं गुकथं ग्वाहालि यानाच्वंगु दु ?
– नेपाल सरकारपाखें येँयाःया निंतिं धकाः १३ लाख चानचुन वइसा गुथि संस्थानपाखें पुजायात माःगु सामाग्रीत हयाबी । अथे हे नगरपालिकापाखें थुगुसी झिगू लाख बिउगु दु । न्हापा न्हय्गू लाख बिया वयाच्वंगुलिइ थुगुसी स्वंगू लाख तना बिउगु दु ।
स्थानीय निकायया निर्वाचन जुइधुंकाः येँ महानगरपालिकाय् झीगु जात्रा बारे थूपिं प्रतिनिधिपिं थ्यंगुलिं यानाः थुगुसी बजेट अप्वयेका बिउगु दु । अथे खःसां थ्व ध्यबा थौंकन्हय्या बजाःभाः कथं तसकं मगाः । थ्व ध्यबा फुक्क वय्कःपिंसं छु छु गुथियात गुलि गुलि धकाः बजेट छुटे यानाबिउगु खः, व हे कथं इनाबीगु खः ।
थुगुसी ला ध्यबा मगाः धकाः दशअवतार मक्यनेगु खँ पिहां वयाच्वंगु दु नि ?
– दशअवतार थुगुसी नं क्यनी, बन्द जुइ मखु । दशअवतार क्यनीगु गुथिया नायः हे इन्द्रजात्रा व्यवस्थापन समितिया उपाध्यक्ष जुया च्वनादीगु दु । वय्कःपिनिगु आन्तरिक समस्याया कारणं दशअवतार मक्यनेगु धयागु हल्ला पिहां वयाच्वंगु जुइमाः । दशअवतार क्यनीगु बन्द जुइमखु, थुगुसी नं क्यनी ।
LEAVE YOUR COMMENTS