स्वनिगःया ऐतिहासिक वस्ती मौलिक स्वरुपय् निर्माण याइगु
येँ – भुखाचं क्षति जूगु स्वनिगःया ऐतिहासिक वस्ती मौलिक स्वरुपय् निर्माण याइगु जूगु दु । राष्ट्रिय पुनःनिर्माण प्राधिकरण कार्यकारी समितिया वंगु शुक्रवाः च्वंगु बैठकं भुखाचं क्षति जूगु सम्पदा वस्तीयात पुलांगु हे मौलिक स्वरुपय् निर्माण यायेगु निर्णय याःगु खः ।
समितिया बैठकं स्वनिगः दुनेया किलागः, सक्व, बुंग, ख्वना थेंज्याःगु परम्रागत नेवाः बस्तीयात पुलांगु हे मौलिक स्वरुपय् निर्माण यायेगु निर्णय याःगु खः । स्वनिगः पिने च्वंगु बस्ती नं उकथं हे निर्माण यायेगु बैठकं निर्णय याःगु दु ।
स्वनिगः पिने नुवाकोट, गोरखा दरवार क्षअेत्र, द्वाल्खाया भिमसेन बजाः क्षेत्रय् लाःगु थासय् नं पुनःनिर्माण यायेबलय् पुलांगु मौलिक वस्तीया स्वरुप मस्यनीकथं यथावत हे कायम यानाः दयेकेगु निर्णय याःगु खः ।मौलिक स्वरुपय् सम्पदा वस्ती पुनःनिर्माण यायेबलय् आवश्यक जुइगु पूर्वाधार लँ, त्वनेगु लः, धः निकास पुनःनिर्माणया निंतिं प्राधिकरण मार्फत हे लगानी यायेगु निर्णय नं याःगु दु ।
बैठकं पुलांगु मौलिक स्वरुपया सम्पदा वस्ती च्वंपिंत निजी आवास पुलांगु हे स्वरुपय् मौलिक व पुरातात्विक शैलीइ पुनःनिर्माणया निंतिं थप न्यय्द्वः तका उपलब्ध याकेगु निर्णय नं याःगु दु ।अथे हे निम्ह व व स्वयां अप्वः छेँथुवालं मंकाः स्वामित्वय् छेँ दनेगु इच्छा यात धाःसा इमित मंकाःकथंया स्वामित्वया लिधंसाय् छेँथुवाःया ल्याः स्वयाः अनुदान नं उपलब्ध याकीगु जूगु दु ।
LEAVE YOUR COMMENTS