एसईईया रिजल्टय् नेपालभाषा विषयय् नम्बर खाली
येँ– म्हिगः पितबिउगु एसईई परीक्षाया लिच्वतय् नेपालभाषा विषय कयाः परीक्षा बिउपिनिगु नम्बर हे मतसे पिहां वःगु दु । वेबसाइटपाखें स्वयेगु लिच्वःपतिइ मेमेगु फुक्क विषयय् नम्बर तयातःगु, तर नेपालभाषा विषयय् धाःसा लिच्वः खाली (ब्लायंक) जुया वयाच्वंगु दु ।
थःपिनिगु स्कुलपाखें एसईई बिउपिं सकसियागुं लिच्वः थथे हे वःगु खँ जगतसुन्दर ब्वनेकुथिया प्रिन्सिपल सुनिता मानन्धरं कनादीगु दु ।
‘परीक्षा नियन्त्रण कार्यालयं बियातःगु वेबसाइटय् सिम्बोल नम्बर तयाः स्वयाबलय् मेमेगु विषय कयाः परीक्षा बिउपिनिगु पूवंक नम्बर सहित ग्रेड सीदुगु दु, तर नेपालभाषा विषय कयाः परीक्षा बिउपिनिगु लिच्वःपतिइ धाःसा नेपालभाषा विषयय् नम्बर खाली तयातःगु दु’, वय्कलं धयादीगु दु ।
जगतसुन्दर ब्वनेकुथिया लिसें येँया कन्या मन्दीर मा.वि.पाखें एसईई बिउम्हेसियागु लिच्वःपतिइ नं नेपालभाषा विषयया नम्बर खाली वयाच्वंगु दु । थुगुसी नेपालभाषा कयाः झिंच्याम्हेसिनं एसईई बिउगु खँ धाःगु दु । ‘नेपालभाषा कयाः जगतसुन्दर ब्वनेकुथिं एसईई बिउपिं खुम्ह व कन्या मन्दीर मा.विं एसईई बिउम्ह छम्हेसिया नम्बर खाली वःगु दु, मेमेगु स्कुलं परीक्षा बिउपिनिगु नम्बर गथे वःगु जानकारी मवःनि’ प्रिन्सिपल मानन्धरं कनादीगु दु ।
नेपालभाषा विषयय् कयाः परीक्षा बिउपिनिगु लिच्वःपति ‘ऐच्छिक १ नेपालभाषा’ धकाः जुइमाःथाय् नं ऐच्छिक १ नेपाली’ धकाः तयाः नम्बर धाःसा खाली यानातःगु खः । थ्व नं गल्ती जूगु खँ वय्कलं धयादीगु दु ।
थ्व बारे परीक्षा नियन्त्रण कार्यालयया स्रोत केन्द्रयात जानकारी बियाबलय् थःपिंसं थुकिया बारे छुं मसिउगु व परीक्षा नियन्त्रण कार्यालयय् हे निवेदन बियाः स्वयेमाःगु खँ धाःगु प्रिन्सिपल मानन्धरं कनादीगु दु ।
LEAVE YOUR COMMENTS