मिसा खलःया नीच्याक्वःगु बुन्हि हनाज्याझ्वः

येँ – नेपालभाषा मिसा खलःया नीच्याक्वःगु बुन्हि हनाज्याझ्वः वंगु आइतवाः खलःया नायः मंगला कारंजितया सभापतित्वय् जुल । ज्याझ्वलय् वाङ्मय शताब्दी पुरुष भाषारत्न डा. सत्यमोहन जोशी मूपाहांकथं झायादीगु खः । ज्याझ्वलय् मूपाहां लिसें विशेष पाहांकथं झायादीपिं प्रा. सुवर्ण शाक्य, मानार्थ जः मय्जु अम्बिका श्रेष्ठ व डा. केशरीलक्ष्मी मानन्धरं खलःया प्रतीक चिन्हय् स्वांमाः व खादां न्ययेकाः २८ प्वाः देवा च्याकाः उलेज्या यानादीगु खः ।

उगु ज्याझ्वलय् खलःया संस्थापक नायः नापं नेपालभाषाया न्हापांम्ह मिसा बाखंच्वमि मोतिलक्ष्मी उपासिकाया ‘मोति बाखंपुचः’ व ‘मोतिमाः’ (निबन्ध संग्रह नेपालभाषा नापं खस् व अंग्रेजी भासं अनुवाद यानातःगु सफूया नं पितब्वज्या याःगु खः । खलःया बुन्हिया लसताय् लाकाः थुगुसी थँजिपिंत हनेगु झ्वलय् वरिष्ठ साहित्यकार रेवती राजभण्डारी, माणिकलक्ष्मी तुलाधर व मैयां स्थापितयात हनेज्या याःगु खः ।

थुकथं हे खलःपाखें लःल्हाना वयाच्वंगु थीथी सिरपाःमध्ये थुगुसी साहित्यकार मय्जु अपर्णा प्रधानयात ‘लुमिन–कमला नेपालभाषा सिरपाः’, मांभाय् पुचः यलयात ‘कृष्णदेवी तण्डुकार लुमन्ति नेवाः हःपाः सिरपाः–११३८’ व नेपालभाषा विषयय् स्नातकोत्तर यानादीम्ह कमलमैयाँ प्रधानयात ने.सं. ११३८ या ‘चम्पा–टंकबिलास–बिजु नेवाः हःपाः’ शोधवृत्ति लःल्हाःगु खः ।

थुकथं हे थीथी खलः, पुचःपाखें सम्मानित जुयादीपिं खलःया जःपिं धर्मशोभा तुलाधर (सल्लाहकार नेवाः देय् दबू), लोचनतारा तुलाधर (मोतिलक्ष्मी उपासिका सिरपाः–११३८), साहित्यकार रेवती राजभण्डारी (नइ पुरस्कार–२०७५), सृजना प्रधान (प्रमुख, नेपालभाषा केन्द्रीय विभाग)यात नं भिंतुना देछाःगु खः ।

ज्याझ्वलय् नवासें मूपाहां जोशीं अनुवादया माध्यमं विश्वन्यंकं नेपालभाषाया साहित्ययात न्यंका वने फइ धासें उत्कृष्ट साहित्य च्वयादीपिं च्वमिपिं दुुगु इलय् हे वय्कःपिनिगु सफूयात अनुवाद यानाः पिथनेगु स्वयेमाः धयादिल ।

डा. केशरीलक्ष्मी मानन्धर, राष्ट्रिय भाषा आयोगया दुजः नापं अंग्रेजी अनुवादक प्रा.डा. तेजरत्न कसांकार, मांभाय् पुचःया नायः हेरारत्न शाक्य व विशिष्ट पाहां प्रा सुवर्ण शाक्यपिंसं भिंतुना न्वचु बियादीगु ज्याझ्वलय् वरिष्ठ आख्यानकार मथुरा साय्मिं थः मदुम्ह जहानया लुमन्तिइ डा. कौशल्या मानन्धर लुमन्ति हना स्थापना यायेगु घोषणा यानादीगु खः ।

खलकं बिउगु जानकारीकथं थुगु हना चिकित्सा लागाय् समर्पित नेवाः चिकित्साकर्मि डाक्टर व नर्सयात छसिकथं पालंपाः लःल्हाइगु जूगु दु ।