श्रीदेवीया दकलय् लिपांगु संकिपा

वइगु मार्च २२ कुन्हु बलिउडया छगू संकिपा चीनय् रिलिज जुइत्यंगु दु । थ्व संकिपा खः बलिउड अभिनेत्री श्रीदेवीया अभिनय दुगु ‘मम’ । थ्व संकिपा श्रीदेवीया भूमिका दुगु वा धाये वं अभिनय याःगु दकलय् लिपांगु फिल्म खः । खतुं छगू रिपार्टकथं चीनय् स्वयां न्ह्यः हे श्रीदेवीया थ्व संकिपा रुस, पोल्याण्ड, संयुक्त अरब इमिरेटस्, अमेरिका, सिंगापुरलिसें पीगू थासय् सार्वजनिक जुइधुंकूगु दु ।

आः चीनय् नं थुकिया प्रदर्शन यायेगु तयारी जुयाच्वंगु खः ।‘छम्ह कलाकारयात वयागु भूमिका, वयागु अभिनय व वं याःगु ज्याया कारणं न्ह्याबलें नं म्हसीका च्वनी, अले इमिसं व हे झीगु निंतिं त्वःता थकी, श्रीदेवीया थ्व ‘मम्’ संकिपा नं छगू अज्याःगु हे सर्वश्रेष्ठताया दसु खः’ संकिपा प्रदर्शन याये न्ह्यः जारी याःगु छगू रिपार्टय् धयातःगु दु ।

थ्व संकिपा आतक गन गन प्रदर्शन जुल, व दक्वं थासयं सकारात्मक प्रतिक्रिया वयाच्वंगु निर्माण पक्षया धापू दु ।रवि उद्यावरं निर्देशनय् मांया भूमिकाय् म्हिताच्वंम्ह श्रीदेवीं थः न्ह्यसु म्ह्याय्या ब्वला साःगु क्यनातःगु दु । थुगु संकिपाय् श्रीदेवीया भूमिकायात कयाः मरणोपरान्त सर्वश्रेष्ठ अभिनेत्रीया राष्ट्रिय पुरस्कार नं लःल्हाःगु खः ।