‘छंगु जिगु माया रतन’ म्ये कासा त्याकामिपिनिगु न्हूगु म्ये व भिडियो सार्वजनिक
येँ- ‘छंगु जिगु माया रतन’ म्ये कासा त्याकामिपिनिगु न्हूगु म्ये शुक्रवाः सार्वजनिक जूगु दु । नेपालभाषाया संगीतख्यलय् तसकं लोकंह्वाना च्वंगु ‘छंगु जिगु माया रतन’ म्येया कभर भर्सन कासा जूगु खः । वहे म्ये कासाय् मिजं सलय् न्हाप लाःम्ह सुजन शाक्य व मिसा सलय् न्हाप लाःम्ह सुजिता डंगोलया सलय् न्हूगु छपु म्ये पिहांवःगु दु । उगु म्ये कासाया ग्वसाः खलःपाखें घोषणा यानातः कथं न्हाप लाःम्ह मिजं व मिसायात सिरपा कथं छपु न्हूगु म्येया रेकर्डिंगया नापनापं उगु म्येया म्युजिक भिडियो दयेका बिइगु कथं ग्वसाः खलःया पाखें सिरपा त्याकामिपिनिगु निंतिं ‘जिगु लसता छ हे’ बोलया म्ये दयेका बिउगु खः ।
सुर मेलोडी रेकर्डिंग स्टुडियोलय् रेकर्डिंग जूगु म्ये निर्मलरत्न शाक्यं च्वयादीगु खःसा नील शाक्यं लसय् हनादीगु खः । थुगु म्ये जीवित जल्मीं म्युजिक एरेन्ज यानादीगु खः । थुगु म्येया म्युजिक भिडियो शुक्रवाः निर्देशक सुरेन्द्र तुलाधरया युट्युबपाखें सार्वजनिक जूगु खः । कलाकारपिं राजु महर्जन व निर्मला श्रेष्ठ शाक्य मू मोडल जुया म्हिता तःगु भिडियोया निर्देशन सुरेन्द्र तुलाधर व सहायक निर्देशन मन्जिल शाक्यं यानादीगु खः । भिडियोय् हुला प्याखंया निर्देशन निशिला शाक्य व हुलाप्याखं सहायक निर्देशन सुजन बज्राचार्य व समा ज्या पुजा शाहीमयजुं यानादीगु खः । अमर चित्रकारं छांयांकन यानादीगु म्युजिक भिडियोया सहायक छायाँकार प्रोजोन पराजुलि खःसा सम्पादनया ज्या अमर चित्रकारं हे यानादीगु खः ।
थ्व म्येयात छगु तःजिगु ज्याझ्वः याना रिलिज यायेगु बिचाः दुगु खःसां कोरोना संक्रमण न्यनावनाः निषेधाज्ञा जारी यानातःगुलिं युट्युब च्यानलपाखें सार्वजनिक यायेमाःगु खँ थुगु म्येया मू हामा सुरेन्द्र तुलाधरं जानकारी बियादिल ।
म्ये कासाय् न्हाप लाःपिंत सिरपा कथं लःल्हाःगु न्हूगु म्ये ‘जिगु लसता छ हे’ या निंतिं यल महानगरपालिका वडा नं १६ या वडा अध्यक्ष निर्मलरत्न शाक्यया नापनापं रन्जना जोशी, सम्झना ल्याव, बाबुराजा ज्यापु, रामकृष्ण जुजु, जापानया उत्तम प्रधान व अष्ट्रेलियाया राजु मानन्धर व पुरन सायमिपिंसं ग्वाहालि यानादीगु खः ।
शुक्रवाः सार्वजनिक जूगु म्युजिक भिडियो थन क्लिक यानाः स्वयादीफइ ।
LEAVE YOUR COMMENTS