बजाः भाःया कारणं जात्रा पर्व संकटय्

येँ- येँ महानगरपालिकाया प्रमुख विद्यासुन्दर शाक्यं महानगर लागा मूर्त व अमूर्त संस्कृतिं जायाच्वंगु जक मखसे महानगर लागा दुनेया अज्याःगु सांस्कृतिक सम्पदाया नं संरक्षण यायेगु ज्याय् महानगरपालिका लगे जुयाच्वंगु खँ धयादीगु दु ।

लिसें वय्कलं महानगर दुनेया अज्याःगु सांस्कृतिक सम्पदा संरक्षणया निंतिं नापं थीथी जात्रा–पर्व संचालनया निंतिं मनपां आर्थिक ग्वाहालि यानाच्वंगु व थज्याःगु नीति येँ मनपाय् दुगु खँ धयादीगु दु ।श्री नाट्यश्वर छुट गुथिं बजाः भाः थहां वनाच्वंगुलिं स्वनिगःया सांस्कृतिक जात्रा–पर्व संचालन यायेत थाकुया वनाच्वंगु सन्दर्भयात कयाः ग्वसाः ग्वःगु अन्तक्र्रिया ज्याझ्वलय् वय्कलं उगु खँ धयादीगु खः ।

ज्याझ्वलय् गुथि संस्थान संचालक समितिया दुजः रामशरण डंगोलं संस्थान अन्तर्गत पहाडी जिल्लाय् खुगू लाख रोपनी व तराई लागाय् छगू लाख विगाह जग्गा दुगु जानकारी बियादिसें परापूर्वनिसें चले जुयाच्वंगु व न्ह्यानाच्वंगु धार्मिक, सांस्कृतिक व ऐतिहासिक महत्वया जात्रा, पर्व व ज्याझ्वःया निंतिं ईयात ल्वःकथं आर्थिक ग्वाहालि बीगुलिइ परिमार्जन याना यंकेगु जुइ धयादिल ।

ज्याझ्वलय् सहभागित वक्तातय्सं लिपांगु इलय् अप्वया वनाच्वंगु बजाः भाःया कारणं मौलिक, परम्परागत, प्रचलित जात्रा, पर्व व संस्कृतिक संचालन यायेत थाकुया वंगु जक मखसे संरक्षणया ज्याय् नं चुनौति वयाच्वंगु खँय् चिउताः प्वंकादीगु खः ।