येँय् एकीकृत वस्ती हे आवश्यक ः मेयर शाक्य

येँ – येँ महानगरपालिकां एकीकृत वस्ती दयेकेत आवश्यक तयारी न्ह्याकूगु दु । मनपाया मेयर विद्यासुन्दर शाक्यं ‘नेपालभाषा टाइम्स’ लिसें खँ ल्हासें येँया पुलांगु वस्तीइ एकीकृत वस्ति दयेकेमाःगु व थुकिया निंतिं मनपां ज्या यानाच्वंगु जानकारी बियादीगु खः ।

येँ १८ वडाय् एकीकृत वस्ति दयेकेगु निंतिं सम्झौता यायेगु ज्या लिपांगु चरणय् थ्यंगु खँ कँसें याकनं सम्झौता जुइगु खँ नं कनादिल । १८ वडाया एकीकृत वस्तिया सीईओ हिउगुलिं सम्झौता लिबाःगु खँ कनादिसें याकनं हे सम्झौता जुइगु बिचाः नं वय्कलं कनादिल ।

मनपां एकीकृत वस्ति दयेकेगु योजनायात मनपां माःगु ग्वाहालि यायेगु व अज्याःगु वस्ति दयेकेगु झ्वलय् नक्सा पास लगायतया खर्च निःशुल्क यायेगु खँ धाःगु दु । पुलांगु वस्तीइ पुलांगु कथं हे छेँ दनेमाःगु व थुकिं हे जक स्वनिगःया ऐतिहासिकता ल्यनीगु खँ नं वय्कलं कनादिल ।