इतुंबहालय् बाजं गुरु हनेज्या
येँ(नेपालभाषा टाइम्स)÷ केशचन्द्र गुंलाबाजं खलः इतुंबहाःपाखें बाजं गुरु हनेज्या याःगु दु । वंगु दिल्लाथ्वपुन्हि (गुरुपुन्हि)कुन्हु खलःपाखें बाजं गुरु हनेज्या याःगु खः ।
बाजं खलःया ज्यासना पुचःया पदाधिकारी व बाजं सयेकादीपिंसं बाजं गुरु दीपकमान शाक्ययात हनेज्या याःगु खः ।
ज्याझ्वलय् बाजं खलःया संरक्षक गिन्दीमान शाक्य व कजि सुजितमान शाक्यं गुरु शाक्ययात खादा क्वखायेकाः, सिन्हः तिकाः हनेज्या यानादीगु खः।
ज्याझ्वलय् बाजं गुरु शाक्य, खलःया छ्याञ्जे उमेशमान शाक्य लगायतं पुर्खापिंसं त्वःता थकूगु थुकथंया सांस्कृतिक बाजंया संरक्षण यायेगु भाला थौंया न्हू पुस्ताया जूगु विचाः तयादिसें बाजं खलःयात नं ईकथं सुधार याना यंकेमाःगु खँय् बः बियादीगु खः । ज्याझ्वलय् न्हूपिं बाजं सयेकादीपिंसं गुरु शाक्ययात थीथी देछा नं लःल्हाःगु खः ।
LEAVE YOUR COMMENTS