यँयाःया म्ये प्वाः खनेगु जात्रा दित

थिमि – यँयाःया इलय् मध्यपुर थिमिइ म्ये प्वाः खनेगु जात्रा थुगुसी हाकनं दित । करिब छगू दशक लिपा थगुनेनिसें शुरु जूगु म्ये प्वाः खनेगु जात्रा थुगुसी दिउगु खः ।२०६३ सालं निसें दिनाच्वंगु थिमिया म्ये प्वाः खनेगु जात्राय् मध्यपुर थिमि ५ चोडे त्वाःया बालकराम श्रेष्ठं म्ये प्वाः खनादीगु खः ।

थनिं दछि न्ह्यः यँयाःपुन्हिकुन्हु मध्यपुर थिमि नगरपालिकाया दिगु भैरव देगःया न्ह्यःने च्वंगु मन्दः न्ह्यःने श्रेष्ठं म्ये प्वाः खनादीगु खः ।
२०६३ सालंनिसें दिनाच्वंगु थुगु जात्रा झिंनिदँ लिपा हाकनं पुनर्जीवन कायेवं सकसिनं थ्व जात्रा आः निरन्तर संचालन जुइगु विश्वास याःगु खः । म्ये प्वाः खनीम्ह थिमियाम्ह हे जुइमाःगु व उकिसनं श्रेष्ठ थरया जुइमाःगु प्रचलन दु ।

तर थुगुसी धाःसा म्ये प्वाः खनेत सुं नं तयार मजुइवं थ्व जात्रा थुगुसी दिउगु खः । म्ये प्वाः खनेत सुं नं तयार मजुइवं थुगु जात्रा मजूसां यँयाःपुन्हिया लसताय् जुइमाःगु मेगु जात्रा धाःसा यथावत रुपं न्ह्याःगु दु । म्ये प्वाः खनेत सुं नं तयार मजूसां यँयाःपुन्हिया म्ये प्वाः खनेगु जात्रा व्यवस्थापन समितिया संयोजनय् यँयाःया मेमेगु जात्रा धाःसा जूगु दु ।

२०६३ सालय् थन यँयाःया इलय् म्ये प्वाः खनेगु जात्राय् कृष्ण नानिचा श्रेष्ठं म्ये प्वाः खंकादीगु खः । २५ दँ तक बन्द जुयाः लोपोन्मुख अवस्थाय् थ्यनेधुंकूगु थ्व जात्राय् वय्कलं २०५२, २०५७ व २०६३ लय् यानाः स्वक्वः म्ये प्वाः खंकादीगु खः । थुगु जात्रायात निरन्तर रुपं संचालनय् हयेगु ल्याखं स्थानीय छपुचः संस्कृतिप्रेमी ल्याय्म्हतय्सं समिति हे दयेकाः जात्रा ल्यंकेगु अभियान न्ह्याकूगु खः ।

थुकिं यानाः २०७४ सालय् बालकुमारीया वीरेन्द्रभक्त गजु श्रेष्ठं व २०७५ सालय् चोडेया बालकराम श्रेष् ठं म्ये प्वाः खंकादीगु खः । थगुने थुगु जात्राया निंतिं मध्यपुर थिमि नगरपालिकां स्वंगू लाख न्यय्द्वः तका आर्थिक ग्वाहालि याःगु खःसा मगाःगु ध्यबा स्थानीय दातापाखें संकलन याःगु खः ।

नेपालभाषा टाइम्स

च्वमिया मेमेगु

• भ्वँतय् न्हापांखुसी नेपालभाषा साहित्य तःमुँज्या
• न्हूदँया लसताय् येँ–चौतारा मोटरसाइकल र्‍याली
• संस्कृतिविद् गणेशराम लाछिया ७५ क्वःगु बुन्हि हन
• लुँया भावय् न्हूगु कीर्तिमान
• नेपालय् न्ह्यानाच्वंगु जुजुवादी आन्दोलन, भारतीय हिन्दूत्वया लिच्वः