‘राजश्व म्हःगुया ९७ प्रतिशत चालु खर्च’

बजेट २०७६÷७७य् सहलह

येँ – अर्बपति व्यवसायी विनोद चौधरीं नेपाः विश्वया दकलय् अप्वः कर म्हइगु देय् जुइगु खतराय् लानाच्वंगु खँ धयादीगु दु । नेपाली कांग्रेसया सांसद जुयाच्वनादीम्ह चौधरीं मंगलवाः संसदय् न्ह्यानाच्वंगु बजेटया सहलह ज्याझ्वलय् न्ववासें सरकारं करया दायरा अप्वयेकेगु स्वयां न्हापा कर पुलाच्वंपिंके हे अप्वः कर कायेगु ज्या यानाच्वंगु खँ धयादीगु खः ।

‘करया दायरा तब्या यायेगु त्वःताः स्थापित करदातातय्पाखें हे थप दोहन यायेगु ज्या राज्ययात ल्वःगु ज्या मखु, थुकी इलय् हे ध्यान बीमफुत धाःसा अर्थतन्त्रय् हे संकटय् लायेफु’ वय्कलं धयादीगु दु ।वय्कलं अप्वयाच्वंगु खर्च पूवंकेगु निंतिं कर जक अप्वयेका यंकाच्वंगु व राजश्व गुलि फु उलि अप्वः मुंकेगु निंतिं आयातयात प्रोतसाहित यानागु खँ धासें थुकीं नेपाः विश्वया हे उच्च ‘कर दर’ दुगु देय् जुइफुगु खँ धयादीगु खः ।

वय्कलं समृद्ध नेपाः दयेकेगु खःसा बजेटया स्वरुपय् हे हिउपाः वयेमाःगु बिचाः प्वंकादीगु खः । वय्कलं बजेट विकास खर्चय् म्होतिं नं ६० प्रतिशत व चालु खर्च ४० प्रतिशत जुइमाःगु बिचाः तयादीगु खः । थ्व झ्वलय् वय्कलं सरकारं नकतिनि न्ह्यब्वःगु बजेटय् चालु खर्च ६२.४ प्रतिशत व पुँजीगत खर्च २६.६ प्रतिशत जक दुगुलिं वइगु दँय् नं विकास निर्माणया ज्या बांलाक न्ह्याये मफइगु खँ नं धयादीगु खः ।

आर्थिक दँ २०७६÷७७या निंतिं सरकारं न्ह्यब्वःगु १५ खर्ब ३२ अर्बया बजेटय् चालु पाखे ९ खर्ब ५७ अर्ब व पुँजीगत पाखे ४ खर्ब ५९ करोड दां विनियोजन यानातःगु दुसा वित्त व्यवस्थाया निंतिं १ खर्ब ६७ अर्ब छुटे यानातःगु दु । वित्त व्यवस्थाया बजेट नं स्वायेबलय् चालुपाखे जक थ्यंमथ्यं ७४ प्रतिशत बजेट थ्यनाच्वंगु दु ।

सांसद चौधरीं राजश्व भर्सेस चालु खर्च जुयाच्वंगु अवस्थायात त्वाःथलाः न्ह्याः वनेमाःगु खँ धासें धयादिल, ‘सरकारं न्ह्यब्वःगु बजेटय् राजश्वया लक्ष्य ९ खर्ब ८१ अर्ब दु, अले चालु खर्च ९ अर्ब ५७ अर्ब दु । थ्व ल्याखं स्वयेबलय् सरकारं म्हइगु राजश्वया ९७ प्रतिशत ला चालु खर्च हे वनीगु जुल । विकासया लागि धाःसा बाह्य ऋण, आन्तरिक ऋण व अनुदानय् हे निर्भर जुइगु जुल ।’

सम्बन्धित बुखँ

LEAVE YOUR COMMENTS