‘महाभियोग निष्क्रिय जुइधुंकल’

येँ (नेपालभाषा टाइम्स)- निलम्बित प्रधानन्यायाधीश चोलेन्द्र शम्शेर जबरां स्पष्ट लिसः मबिउगु खँ कांग्रेसया सांसद लिसें समितिया दुजः मीन विश्वकर्मा धयादीगु दु । जबरां थःत लाःगु द्वपंया तथ्यगत लिसः मबिउगु खँ विश्वकर्मा धयादीगु खः । म्हिगः निलम्बित प्रधानन्यायाधीश जबरा व समितिया दुजःपिनि दथुइ स्वघौत्या न्ह्यसः लिसः जूगु खः ।

लिसः बीगु झ्वलय् प्रधानन्यायाधीश जबरां थःत लाःगु महाअभियोग प्रस्ताव निष्क्रिय जुइधुंकूगु धासें थःगु भूमिका सांसदतय्त मयःगुलिं महाअभियोग तःगु द्वपं बियादीगु खः । जबरां म्हिगः लिसः बीगु झ्वलय् धयादिल, ‘महाअभियोग प्रस्ताव निष्क्रिय जुइधुंकूगु दु, जिं संसद्या सम्मानया नितिं नागरिकया ल्याखं वयागु खः, थ्व प्रस्ताव संविधान व नियमावली संसदं पारित मयाः, जितः थनं न्याय बीमाः ।’

अदालतय् गुटबन्दी जूगुलिं थः लिपाया न्यायाधीश दिपक कार्कीयात प्रधानन्यायाधीश दयेकेगु प्रस्ताव वःगु खःसां थम्हं उकियात अस्वीकार यानागुलिं थःत महाअभियोग तःगु खँ नं जबरां धयादीगु दु । थम्हं थुकथं न्यायपालिका न्ह्याये फइमखु धकाः उकियात अस्वीकार यानागु खँ वय्कलं धयादीगु खः ।

उकथं हे वय्कलं कार्कीयात प्रधानन्यायाधीश दयेकाः थःत महाअभियोग तयेगु ज्या न्यायपालिकायात कमजोर यायेगु कासा जूगु धासें धयादिल, ‘प्रधानन्यायाधीशयात कमजोर दयेकाः न्यायपालिकायात कमजोर दयेकेगु कुतः याःगु दु, जि विधि पद्धतिं वयाम्ह खः, पार्टीया दबाब व मिडियाया दबाबय् ज्या यायेमखु ।’

उकथं हे प्रधानन्यायाधीश जबरां पुलांपिं प्रधानन्यायाधीशतय्सं सर्वोच्च अदालतय् भाग फ्वनेगु यानाच्वंगु द्वपं नं बियादीगु दु । वय्कलं पुलांपिं प्रधानन्यायाधीशतय्सं निवृत्त जुइधुंकाः नं अदालत चले यायेत स्वयाच्वंगु द्वपं बिसें धयादिल, ‘रिटायर्ड जुइधुंकाः नं वय्कःपिंसं थीथी कोणं न्यायपालिकाय् डिक्टेट यायेत स्वल, कर्मचारीइ थःगु अनुकूलता मालेगु ज्या यात, थ्व जिगु स्वभावं जितः मबिउगु ज्या खः, कर्मचारीया सरुवा–बढुवाय् भाग फ्वनेगु ज्या यानाच्वन, पुलांपिं न्यायाधीशपिं संरक्षक खः धासें भाग फ्वनेगु ज्या यानाच्वन ।’

समितिइ एमालेया सांसद कृष्णभक्त पोखरेलं प्रधानन्यायाधीश जबरां तथ्यगत खँ स्वयां नं भावनात्मक खँ जक ल्हाःगु खँ धयादीगु दु । पत्रकारत लिसे खँ ल्हायेगु झ्वलय् पोखरेलं धयादिल, ‘बयान शुरु जुइवं सैद्धान्तिक न्ह्यसः न्यनेगु ज्या जूगु खः, तर वय्कलं लिसः बीगु झ्वलय् प्रमाण पेश यायेगु स्वयां नं भावनात्मक खँ जक तयादिल, ठोस रुपय् प्रमाण ज्वनाः मझाः, वय्कलं थःत लाःगु द्वपंया अस्वीकार यायेफइ कथंया तथ्य ज्वनाः वयेमाःगु खः, अथे यानामदी ।’

महाअभियोग सिफारिस समितिं म्हिगः जबरायाके न्यनेत तयार यानातःगु ४३ गू न्ह्यसः मध्ये प्यंगू न्ह्यसः जक न्यंगु दु । जबराया बयान थौं नं जारी जुइगु खँ धाःगु दु ।

सम्बन्धित बुखँ

LEAVE YOUR COMMENTS