मनकामना पुनःनिर्माणय् १४ करोड

भुखाचं पूर्णरुपं क्षति जूगु गोरखा जिल्लाया प्रसिद्ध धार्मिकस्थल मनकामना देगःया पुनःनिर्माणया निंतिं १४ गू करोड स्वयां अप्वः खर्च जूगु दु ।मनकामना देगः पुनःनिर्माणया निंतिं नेपाल सरकार पुरातत्व विभागमार्फत् प्यंगू करोड व ल्यं दुगु ध्यबा भक्तजनपाखें ग्वाहालिकथं प्राप्त जूगु देगः जिर्णोद्वार समितिया कोषाध्यक्ष कृष्णबाबु श्रेष्ठं जानकारी बियादिल ।

‘देगः पुनःनिर्माणया निंतिं मुक्कं १४ गू करोड ६४ गू लाख तका खर्च जूगु दु’, वय्कलं धयादिल, ‘सरकारं उपलब्ध याकूगु बाहेक दक्वं ध्यबा भक्तजनपाखें ग्वाहालि संकलन जूगु खः ।’देगः निर्माणया निंतिं दकलय् अप्वः खर्च लुँइ जूगु कोषाध्यक्ष श्रेष्ठं जानकारी बियादिल । देगःया पौ, गजू, झ्याः–लुखा लगायतया थासय् लुं सीत जक १८ किलो लुँ खर्च जूगु दु ।

देगः निर्माण याःगु इलय् कर्मचारीपाखे कुल ५५ गू लाख ख्वीन्याद्वः व प्रशासनिकपाखे ६२ गू लाख पीछद्व खर्च जूगु दु । अथे हे देगः निर्माणया ज्याला, निर्माण सामग्री, लुँ लगायत यानाः १३ गू करोड, ४६ गू लाख चय्द्वः तका खर्च जूगु कोषाध्यक्ष श्रेष्ठं जानकारी बियादिल । देगः जिर्णोद्वर समितिं चन्दा बाकस, बैंकमार्फत व थीथी रसिदपाखें देगः पुनःनिर्माणया निंतिं ग्वाहालि संकलन यायेगु अभियान न्ह्याकूगु खः ।

अभियानपाखें नगद व जिन्सी यानाः करिब १५ गू करोड २७ गू लाख नीछद्वः व ९२८ तका दां संकलन जूगु व ल्यं दुगु छगू करोड पीगू लाख पीप्यद्वः ७०४ तका दां बैंक ब्याजपाखें आम्दानी जूगु खः । देगः जिर्णोद्वार लिपा समितिया खाताय् थौंकन्हय् मुक्कं न्यागू करोड ८६ गू लाख मौज्दात ल्यं दुगु धाःगु दु ।

करिब ३०० दँ न्ह्यः निर्माण जूगु मनकामना देगः वि.सं. १९९० सालया भुखाचं दक्षिण–पश्चिमपाखे ६ गू इन्च धेचुइवं २०६८ सालय् देगः जिर्णोद्वारया निंतिं सहलह न्ह्याःगु खः । वि.सं. २०७२ सालया भुखाचं देगः पूर्णरुपं क्षति जुइवं पुनःनिर्माण याःगु खः । वि.सं. २०७२ साल जेठ २५गते शुभसाइत यानाः देगःया गजू लिकयाः साउन ६ गते जग पुजा यानाः देगः पुनःनिर्माणया ज्या न्ह्याकागु जिर्णोद्वार समितिया संयोजक नरेन्द्रबाबु श्रेष्ठं कनादिल ।

समितिं तत्कालीन अवस्थाय् जिर्णोद्वारया निंतिं च्यागू करोड पीच्यागू लाख तुइगु प्रारम्भिक अनुमान तयार याःगु खःसां नं निर्माणया क्रमय् लागत अप्वया वंगु खः । समितिं राष्ट्रिय पुरातत्व विभागं क्वःछिउगु मापदण्डकथं देगः पुनःनिर्माण यानागु संयोजक श्रेष्ठं जानकारी बियादिल ।

‘थ्व स्वयां न्ह्यः देगःया पल्लिइ सिजःया जलप तयातःगु खः, आः देगःया गजू, पौ, मूलुखाय् लुँया जलप तयाः बांलेकगु ज्या जूगु दु’, वय्कलं धयादिल । देगःया पल्लिइ लुँया जलप तःगु इलय् नाइट्रिक एसिडया प्रयोग यानाः जक तयेगु याःसां नं थःपिंसं लुँया जलप तइगु इलय्तकं पुलांगु हे प्रविधिकथं चुपाउँ, चि, पाउँ, अपा चुं छ्यलाः तयागु वय्कलं जानकारी बियादिल ।

वि.सं. २०७४ साल चैत महिना दुने हे देगः पुनःनिर्माणया ज्या क्वचायेकेगु लक्ष्य दुगु खःसां नं भुखाय् लिपाया नाकाबन्दी, देगःयात माःगु आकारया सिँया अभाव लगायतया कारणं करिब च्याला लिपा जक निर्माण सम्पन्न जूगु खः । मनकामना द्यःयाथाय् नेपाःलिसें भारत लगायतया देशं भक्तजन वयेगु यानाच्वंगु दु । द्यःया दर्शन व पुजाआजाया निंतिं दँय्दसं १२ गू लाख तक भक्तजन वयेगु यानाच्वंगु दु ।

सम्बन्धित बुखँ

LEAVE YOUR COMMENTS