
येँ – येँ महानगरपालिका व तोखा नगरपालिका दथुइ बाल उद्यान निर्माणया निंतिं छगू सम्झौता जूगु दु । तोखाय् दयेकीगु बालमैत्री उद्यान या निंतिं निगू नगरपालिका दथुइ उगु सम्झौता जूगु खः । थनया राष्ट्रिय सभागृहय् जूगु छगू ज्याझ्वःया दथुइ सम्झौता पती येँ मनपाया मेयर विद्यासुन्दर शाक्य व तोखा नपाया मेयर प्रकाश अधिकारीं ल्हाःचिं तयादीगु खः ।
सम्झौतापती स्वदँया दुने बालमैत्री उद्यान निर्माण याये सिधयेकेमाःगु खँ न्ह्यथनातःगु दु । यदि क्वःछिनातःगु इलय् उद्यान निर्माणया ज्या सिधल धाःसा येँ मनपां कुल लागतया बछि ध्यबा ब्यहोरे याइगु जूगु दु । येँ मनपां बिउगु ध्यबा उद्यान निर्माण बाहेकं मेगु ज्याय् खर्च याये मदइगु व उद्यान निर्माणया इलय् तोखा नगरपालिकायात आवश्यक जुल धाःसा प्राविधिक ग्वाहा िनापं व्यवस्थापनय् नं ग्वाहालि यायेगु सम्झौता पती न्ह्यथनातःगु दु ।
ज्याझ्वलय् नवासें येँ मनपा मेयर शाक्यं विकास व समृद्धिया निंतिं महानगरपालिकां पहल न्ह्याकेधुकूगु धासें वइगु आर्थिक दँय् नं महानगरपालिकां नगरपालिका नापं साझेदारी यायेगु ज्याया निंतिं १० करोड तका बजेट विनियोजन यानागु जानकारी बियादिल ।
तोखा नगरपालिकाया मेयर अधिकारीं तोखाय् बालमैत्री उद्यान दयेकेत ग्वाहालि याःगुलिं येँ मनपायात सुभाय् देछासे सांस्कृतिक व पर्यटकीय दृष्टिकोणं महत्वपूर्ण तोखा नगरपालिकाया विकासय् वइगु दिनय् नं थुकथं हे ग्वाहालि यायेत इनाप यानादिल ।
अथे हे येँ मनपाया उपमेयर हरिप्रभा खड्गीं निगू नगर दथुइ जूगु सम्झौता व साझेदारी ज्याझ्वलय् समग्र येँ देय्या विकासय् ग्वाहालि जू वनीगु विश्वास प्वंकादिसें येँया विकासया निंतिं जनप्रतिनिधि हे सक्रिय रुपं लगे जुइमाःगु खँय् बः बियादिल । उगु इलय् येँ मनपा प्रमुख शाक्यं उद्यान निर्माणया निंतिं तोखा नगरपालिका प्रमुख अधिकारीयात छगू करोडया चेक नं लःल्हानादीगु खः ।
LEAVE YOUR COMMENTS