ने. सं. ११४४ कौलाथ्व पारू - नःलास्वनेगु

‘मातृभाषी पत्रकारिताया संरक्षण राज्यं यायेमाः’

येँ (नेपालभाषा टाइम्स)- अन्तर्राष्ट्रिय मातृभाषा दिवसया लसताय् नेवाः पत्रकार राष्ट्रिय दबूया ग्वसालय् बुधवाः छगू अन्तक्र्रिया ज्याझ्वः जुल । ‘मातृभाषा पत्रकारिताया महत्व’ विषयय् जूगु ज्याझ्वलय् सहभागीपिंसं मातृभाषा पत्रकारिताया संरक्षण, विकासया निंतिं म्हितेमाःगु भूमिकायात कयाः थःथःपिनि बिचाः तयादीगु खः । ज्याझ्वलय् सहभागीपिंसं मांभासं पिदनीगु पत्रपत्रिका ब्वनीपिं पाठक, मांभासं दयेकीगु रेडियो, टेलिभिजनया ज्याझ्वः स्वइपिं न्यनीपिं स्रोता दर्शकपिं तकं म्हो जुया वनाच्वंगु खँ निसें मांभासं पत्रकारिता याये आर्थिक रुपं नं थाकुया वयेधुंकूगु बिचाः प्वंकूगु खः ।

ज्याझ्वलय् न्ववानादिसें मूवक्ता वरिष्ठ पत्रकार सुरेश मानन्धरं मांभासं पत्रकारिता यायेगु धयागु मांभाय् नं संरक्षण यायेगु ज्या जूगुलिं मातृभाषाया पत्रकारिताया संरक्षणया निंतिं राज्यं नं ग्वाहालि यायेमाः धयादिल ।

मांभाय्या संरक्षण व विकास यायेगु निंतिं लेखनया नं तसकं महत्वपूर्ण भूमिका जुइगु खँ न्ह्यथँसें वय्कलं धयादिल, ‘मांभासं पत्रकारिता यायेबलय् पत्रकारतय्सं थः पाठक, दर्शक स्रोतपिंत सुसूचित यायेगु ज्या जक याइमखु, थुकिया लिसेलिसें मांभाय् संरक्षणया ज्या नं यानाच्वंगु दइ । देशय् दुगु फुक्क मांभाय्या संरक्षणया निंतिं राज्यं महत्वपूर्ण भूमिका म्हितेमाः । उकिं मांभाय्या संरक्षणय् ज्या यानाच्वंगु मातृभाषी पत्रकारिताया संरक्षणय् नं राज्यं भूमिका म्हितेमाः ।’
ज्याझ्वःया कजि तेजनारायण महर्जनं मांभासं ब्वनीपिं, स्वइपिं, न्यनीपिं पाठक, स्रोता, दर्शकत म्हो जुया वनाच्वंगु अवस्थाय् मांभासं जुइगु पत्रकारिताया महत्वबारे थुइकेगु दायित्व नं मातृभाषी पत्रकारतय्त हे वयाच्वंगु खँ धयादिल ।
ज्याझ्वःया अध्यक्षता यानादिसें नेवाः पत्रकार राष्ट्रिय दबूया केन्द्रीय नायः नृपेन्द्रलाल श्रेष्ठं मातृभाषा पत्रकारिताया संरक्षण व मातृभाषी पत्रकारतय् हकहीतया निंतिं पत्रकार दबुलिं म्हिताच्वंगु भूमिकायात अझ क्वातुकायंकेगु प्रतिबद्धता प्वकादीगु खः ।