परम्परागत तन्त्र साधना सम्बन्धी गोष्ठि

येँ – नेपाल प्रज्ञा प्रतिष्ठान दर्शन विभागया ग्वसालय् प्रतिष्ठानया न्हूगु पुस्तकालय भवनया सभाकक्षय् नेपाली परम्परागत तन्त्र साधना सम्वन्धी गोष्ठि जुल । विद्वान् प्रा. विद्यानाथ उपाध्यायं मू वक्ताया रुपय् प्रवचन बियादीगु गोष्ठिइ वय्कलं पशुभाव, वीर उपसना व पूर्ण उपसानाया माध्यमं अलौकिक शक्ति प्राप्त याये फइगु न्ह्यथँसें फुक्कं साधन व वस्तुया नां शक्तिया आधारय् हे केन्द्रीत जुयाः नामाकरण जुयाच्वंगु दु धयादिल ।

त्रिविया पुलांम्ह शिक्षाध्यक्ष तकं जुयादीम्ह वय्कलं मल्लाकालय् तान्त्रिक विधिपाखें प्राण प्रतिस्था यानाः थापना यानातःगु देगः भुखाचं दुना वंगुलिं अमूर्त सांस्कृतिक सम्पदा ने न्हना वनीगु खतरा ब्वलनाच्वंगु दु धयादिल ।

प्रताप मल्लया पालय् आपालं देगलय् तान्त्रिक विधिं प्राण प्रतिस्था यानाः मूर्तित थापना यायेगु ज्या जुल, अज्याःगु देगः भुखाचं दुनेधुंकाः पुनःनिर्माण यायेगु ज्या ला जुइ, तर तान्त्रिक विधिं प्रतिस्थापन यायेगु ज्या मजुल धाःसा अमूर्त सांस्कृतिक सम्पदा लोप जुइगु अवस्था दु धासें उकिया निंतिं सम्बन्धित निकायया ध्यान वनेमाः धयादिल ।

ज्याझ्वःया मूपाहां प्रतिष्ठानया पुलांम्ह कुलपति बैरागी काईलां लः व मि, फय् व चा, निभाः व किचः, सत्रु व मित्र थें दुःख व सुख नं जीवनया महत्वपूर्ण पक्ष जूगु कारणं थुकिं जीवनयात गबलें नं त्वःतीमखु धयादिल ।

ज्याझ्वलय् प्रतिष्ठानया कुलपति गंगाप्रसाद उप्रेतीं आपालं चिन्तन मनन यायेमाःगु विषयय् जूगुलिं विद्ववर्गनाप सहलह यायेत हे दर्शन विभाग स्वनातयागु खँ कनादिसें थुगुसी नं कविता महोत्सव लगायत प्रज्ञाया हिरक जयन्तीया लसताय् दछियंकं थीथी ज्याझ्वः याना वनेगु जानकारी बियादिल ।