‘न्हापांगु पलाः’या न्यादँ बुन्हि

येँ – छेँय् याकःचा लानाच्वंपिं जिथिपिनि सुसाःकुसाः याना वयाच्वंगु संस्था ‘न्हापांगु पलाः’ नेवाः मिसा पुचःया न्यादँ बुन्हि म्हिगः न्यायेकल । ज्याझ्वलय् मूपाहां कथं झायादीम्ह येँ मनपाया मेयर विद्यासुन्दर शाक्यं झी अजाअजिपिंत सुखपूर्वक म्वायेगु ज्याय् ग्वाहालि याना वयाच्वंगु न्हापांगु पलाःयात येँ मनपाया नं ग्वाहालि दइगु खँ कनादिल ।

बागमति प्रदेशया सांसद राजेश शाक्यं न्हापांगु पलाःया छेँ दनेगु जुल धाःसा थःपिंसं सांसद कोषपाखें ग्वाहालि यायेगु बचं बियादिलसा वडा २० या वडा अध्यक्ष राजेन्द्र मानन्धरं येँ मनपाया ज्याथजिपिनि लागिं थीथी ज्या याना वयाच्वंगु खँ कनादिल ।

ज्याझ्वलय् थीथी ख्यलय् योगदान यानादीपिं प्रा. तीर्थराज शाक्य, डा. सुमित्रा मानन्धर गुरुङ, सिल्भिया श्रेष्ठ, रत्नकाजी मन व मातृशक्ति संस्थायात हनेगु ज्या नं जूगु खः । ज्याझ्वः न्हापांगु पलाःया नायः शिला साय्मिया सभापतित्वय् जूगु खः । उगु हे ज्याझ्वलय् न्हापांगु पलाःलिसे आवद्ध ज्याथजिथिपिंत बिस्कं म्हसीका पौ बीगु ज्या नं जूगु खः । थ्व संस्थाय् ७० स्वयां अप्वः जिथिपिं आवद्ध दु ।