विश्वकप थःथःगु मिखाय्

अर्जेन्टिना यः धाःसा कलाः तंचाइगु,
ब्राजिल ल्यये धाःसा ससःकेहेँ तंचाइगु,
विश्वकपय् नेपालं म्हितीगु गुबलय् जुइ
गोल… गोल… धकाः हालेखनीगु गुबलय् जुइ…?

वंगु शनिवाः जूगु निक्वःगु नेवाः आर्टिस्ट फुटसलया सिरपाः लःल्हायेगु ज्याझ्वलय् गायक यमन श्रेष्ठं थःगु रेकर्ड हे मजूनिगु म्येँ न्यंकल ।धाथें यमनं धाःथें फुटबलया महाकुम्भ धाइगु विश्वकप धेंधेंबल्लाखय् नेपाः थ्यनीगु गुबलय् गुबलय् तिनि का, अले नेपाःया निंतिं गोल…. गोल… धकाः चिल्लाये दनेगु नं म्हगस हे जक तिनि ।

तर म्हिगः निसें रुसय् सुरु जूगु विश्वकप फुटबलय् सारा नेपाःमि धाःसा झुमे जुइधुंकूगु दु । यमनं म्येँय् हाः थें थःत यःगु टिमया सपोर्ट यानाः सुं तंचाइ धकाः ग्यानाच्वंगु मदु । नेपाःया निंतिं गोल… धकाः हाले मखंसां थःत यःगु टिमं याःगु गोलय् चिल्लाये दनेगु सुरु जुइधुंकूगु दु ।

विश्वकप रोमाञ्चया सवाः कायेत नेवाः कलाकारत जक लिउने लाइगु ला खँ हे मजुल । थुगुसी सुनां सुनां छु छु टिमया समर्थन यानाः विश्वकपया मज्जा कायेत्यंगु दु ले ? छक्वः स्वये–

यमन श्रेष्ठ
गायक–संगीतकार

यदि फुटबलय् बाजी तयाः स्वल धाःसा यमन न्ह्याब्लें बाजी बुइम्ह हे जुइ । छाय्धाःसां यमन कासाया झ्वलय् न्ह्याबलें सु बुनाच्वन वया पं लिइम्ह लानाच्वन ।

वय्कलं धाल, ‘फुटबल स्वये यः, थुगुसी विश्वकप नं मज्जां स्वयेगु जुइ । तर न्ह्याम्ह त्याःसां छुं ल्याः मदु । जितः थ्व हे छगू टिम यः धयागु मदु ।’

‘म्येँ हाः थें धाथें तिरिमय्जु तंचाइ धकाः ग्यानाः जक खः लाकि ?’ धयागु न्ह्यसलय् वय्कलं धयादिल, ‘अथे मखु, वयात नं थ्व हे टिम यः धयागु मदु । व नं जि थें हे खः ।’

छाय् बुनाच्वंगु टिमया सपोर्ट धयागु खँय् यमनं धाल, ‘जि नुगः
भचा क्यातु नि….। अय् जुयाः सुनां न्हापां गोल नल, जिं वयात हे सपोर्ट यायेगु ।’थुगुसी नं यमन विश्वकप स्वयेत तयार जुयाच्वंगु दु । पिहां वनाः स्वःवनेगु उलि बानी मदु । ‘थ्व पालय् नं जःलाखःला पासापिंनाप छेँय् हे च्वनाः स्वयेगु जुइ’ वय्कलं धयादिल ।

पवित्र कसाः
गायक–संगीतकार

झी सकसिनं म्हसिउम्ह लोकंह्वाःम्ह गायक पवित्र कसाः । अले सकसिनं सिउ कि वय्कः नाइक, तीजक खँ ल्हाइम्ह । थथे तीजक खँ ल्हाइम्ह पवित्र फुटबलय् धाःसा तीव्र गति यःम्ह जुयाच्वन ।

उकिं विश्वकपय् न्ह्याबलें नं वयागु समर्थन जर्मनीयात जुइगु जुयाच्वन । ‘जितः तुच्च तुच्च थ्वानाः फुटबल म्हितीगु स्वये मयः, तीव्र गतिं ब्वाँय् वनाः विपक्षीया पोस्टय् आक्रमण याइगु थें ज्याःगु रोमाञ्च मेगु मदु’ धयादीम्ह पवित्रयात नेपाःया अप्वःसित यःगु टिम अर्जेन्टिना, ब्राजिलं म्हितीगु कासा स्लो जुइगुलिं थुपिं टिम उलि कासा यः मताः ।

‘जितः दकलय् न्हापां जर्मनी यः, जर्मनी मखुसा इंग्ल्यान्ड, व मखुसा फ्रान्स यः’ थुगुसी छेँय् हे प्रोजेक्टर तयाः फुटबल स्वयेगु बिचाः यानाच्वनादीम्ह गायक पवित्रं धयादिल, ‘युरोपियन गेम स्वयेगु तसकं न्ह्यइपु । प्रिमियर लिग गुलि फास्ट जुइ सि हे सिउनि ।’‘ल्याटिन देय्त ब्राजिल अर्जेन्टिनाया कासा कलात्मक ला जुइ, तर वास्याहां जुइ । स्वये हे म्हाइपु’ पवित्रया बिचाः दु ।

 

शोभा महर्जन
कलाकार, फेसन डिजाइनर

च्यादँ ति दत फेसन डिजाइनर शोभां फुटबल स्वयेगु सुरु याःगु । गुबले निसें फुटबल स्वयेगु सुरु याःगु खः, उबलय् निसें ब्राजिलया सपोर्टर खः शोभा । ‘न्हापां निसें ब्राजिल यः, उकिं थुगुसी नं ब्राजिलयात हे समर्थन यायेगु जुइ’ वय्कलं धयादी ।

‘थुगुसी खास हे गन वनाः फुटबल स्वयेगु धयागु प्लानिङ्ग मयानानि, अय्सां फाइनल छगू ला पासापिं नाप च्वनाः स्वये माली ला धयागु बिचाः दु’ वय्कलं धयादिल ।

 

सुरजवीर वज्राचार्य
गायक, आरजे

गायक, एफएम आरजे सुरजवीरं फुटबल स्वयेगु निंतिं वंगु विश्वकपय् छगः हेडफोन तयार यानातःगु जुयाच्वन । फुटबल स्वयेत हेडफोन छाय् ले ? अजूचायापुगु खँ ।सुरजवीर छम्ह फुटबलप्रेमी खः ।

विश्वकपय् फयांफतले त्वःमफिक कासा स्वयेमाःगु ला जु हे जुल । विश्वकप वइगु बहनी, अले बहनी एफएमय् लानाच्वनीगु । फुटबल स्वयेबलय् सः मवयेक स्वयेगु न्ह्याइपुगु खँ मजुल ।फुर्सद दतकि ज्याकुथिइ हे फुटबल स्वयेमाःगुु, तर मेपिंत डिस्टर्ब नं ला यायेमजिल ।

उकिं सुरजं झिगू मिटर ताहाकःगु तार तयाः हेडफोन दयेकातःगु जुयाच्वन । फुर्सद दतकि हेडफोन न्हाय्पनय् तयाः स्वल, सुयातं डिस्टर्ब नं मजुल ।थुगुसी सुरजया सपोर्ट अर्जेन्टिनायात जुइ । खास ला यःगु टिम इटली व अर्जेन्टिना खः । तर थुगुसी इटली विश्वकपय् छनोट हे मजुल ।

‘उकिं फुल सपोर्ट अर्जेन्टिनायात जुइ’ सुरजवीरं धयादिल ।अर्जेन्टिना यःगु कारण बारे वय्कःया धापू दु, ‘छाय् यइ धयागु ला कारण हे मदइगु जुयाच्वन । यल कि अथें हे यइगु । अय्सां अर्जेन्टिनाय् न्हापांनिसें स्टार कासामित दु, उमिसं म्हितीगु फुटबल टेक्निकलि बांलाः ।’स्वाभाविक रुपं थुगुसी सुरजयात यःम्ह कासामि अर्जेन्टिनाया लियोनल मेस्सी हे जुल ।

सुरेन्द्र तुलाधर
निर्देशक, कलाकार

सुरेन्द्र तुलाधरया विश्वकप फुटबल स्वयेगुयात कयाः छगू सुखद् अनुभव दु । सुरु सुरुइ नेपालय् टेलिभिजन पाखें विश्वकप क्यनेगु सुरु याःबलय् छेँय् टेलिभिजन मदुगुलिं पासापिंथाय् वनाः फुटबल स्वःवनीगु ।

चान्हय् चान्हय् छेँ नं पिहां वनाः फुटबल स्वःजूगुलिं छन्हु सुरेन्द्रया अबुं वय्कलं हे मसिइक छेँय् टिभी न्यानाः तयेहल । ‘उबलय् निसें अप्वः धयाथें छेँय् हे च्वनाः विश्वकप स्वयेगु बानी जुल ।

थुगुसी नं छेँय् हे च्वनाः स्वयेत ६५ इञ्चया टिभी हयेधुन’ निर्देशक तुलाधरं कनादिल ।पासापिं मुनाः छेँय् हे विश्वकप स्वयेगु तयारी यानाच्वनादीम्ह सुरेन्द्र नं गुबलय् निसें विश्वकप स्वये खंगु खः उबलय् निसें अर्जेन्टिनाया फ्यान लानाच्वन ।

वय्कलं न्हापांखुसी विश्वकप स्वयागु ई लुमंकुसें धयादिल, ‘१९८६ इ म्याराडोनां ल्हातं गोल याःगु कासा न्हापांखुसी विश्वकप स्वयागु कासा खः । न्हापा फुटबल स्वये मयःसां उबलय् निसें फुटबल स्वये यल । अले उबलय् निसें हे अर्जेन्टिनाया हे समर्थन यानाच्वनागु दु ।’

न्हापा म्याराडोनाया फ्यान निर्देशक सुरेन्द्र थौंकन्हय् मेस्सीया फ्यान जुयाच्वंगु दु । ‘वयागु खेल कौशल ला गज्जब हे जुल । लिसें वयागु स्वभाव नं ल्वःवनापुसे च्वं । न्ह्याम्हेस्यां न्ह्यागु धाःसां, न्ह्यागु याःसां न्हिलाः न्हिलाः म्हितेफु । तं चाइ मखु ।’

रजनी शाही, कलाकार, एंकर

थौंकन्हय् लोकंह्वाना वयाच्वंम्ह कलाकार, एंकर रजनी शाही गुबलें निसें फुटबल थुल, उबलय् निसें ब्राजिलया समर्थन याना वयाच्वनादीम्ह खः । उकिं स्वाभाविक खः, थुगुसी नं वय्कःया सपोर्ट ब्राजिलयात हे दु । ‘छाय् ले ब्राजिल ?’ लिसलय् अःखःबतं
वय्कलं हे न्ह्यसः तयादी, ‘रोनाल्डो, रोनाल्डिन्हो थेंज्याःपिं कासामिपिं दुगु ब्राजिल सुयात मयइ ?’

रजनीं थ्वयां न्ह्यः विश्वकपया निगू संस्करण स्वयेधुंकल, थ्व पालय् स्वंगूगु संस्करण स्वयेत्यंगु दु । ‘जिं विश्वकप स्वयाबलय् रोनाल्डो, रोनाल्डिन्होपिंसं उत्कृष्ट कासा म्हिताच्वंगु खः । साम्भा डान्स थेंज्याःगु उमिगु कलात्मक कासां मोहित यात धायेमाली’ वय्कलं धयादी, ‘आः चाहिँ जिमिगु जेनेरेशन कथं यःम्ह कासामि नेयमार खः ।’

थुगुसी न्ह्यःने न्ह्यःनेया कासा ला छेँय् हे च्वनाः स्वयेगु जुइ धयादीम्ह रजनीया बिचाः दु, ‘सेमिफाइनल निसें पासापिंलिसे छेँ लिक्कसं गनं तग्वःगु स्क्रिनय् क्यन धाःसा अन स्वःवने माली ।’

रुपेन्द्र श्रेष्ठ थक्वाःमि
कलाकार
कलाकार रुपेन्द्र श्रेष्ठ नं यःगुया छुं कारण मदु धयादीम्ह खः । वय्कःयात यःगु टिम– अर्जेन्टिना ।

अर्जेन्टिनाया नां हे यः, अले वँचुगु–तुयुगु बाला बाला दुगु जर्सी नं उतिकं हे यःम्हं वय्कलं धयादी, ‘यल कि यःगु टिमया न्ह्यागु नं यइगु जुयाच्वन खनि का ।’

गुबलय् निसें फुटबल स्वयेगु सुरु यात, उबलय् निसें हे रुपेन्द्रयात अर्जेन्टिना हे यः । बांबांलाःपिं कासामि दु, अले म्हितीगु कौशलं नं रुपेन्द्रयात अर्जेन्टिनाप्रति मोहित यानातःगु खः ।

न्ह्याबलें थें थुगुसी अर्जेन्टिनां विश्वकप त्याकि ला धयागु आशा वय्कःया दु । अर्जेन्टिनायाके लियोनल मेस्सी थेंज्याःम्ह थौंकन्हय्या विश्वया हे उत्कृष्ट कासामि दु । रुपेन्द्रयात यःम्ह कासामि खः – मेस्सी ।

थ्व विश्वकप मेस्सीया अन्तिम विश्वकप जुइ, उकिं नं थ्व पालय् ला अर्जेन्टिना हे त्याःसा जिउ धयागु रुपेन्द्रया इच्छा खः ।
अर्जेन्टिनाया समर्थनय् रुपेन्द्रं थुगुसी प्रोजेक्टर हे कयाः च्याम्ह झिम्ह पासापिं मुनाः विश्वकप स्वयेगु तयारी यानाच्वनादीगु दु ।

जीवित जल्मी
संगीतकार, म्युजिक एरेन्जर

वंगु शनिवाः जूगु निक्वःगु नेवाः आर्टिस्ट फुटसलय् उत्कृष्ट गोलकिपरया सिरपाः त्याकादीम्ह खः– म्युजिक एरेन्जर जीवित जल्मी । उत्कृष्ट गोलकिपरया सिरपाः त्याकूसां जीवित फुटबलया डाइहार्ड फ्यान धाःसा मखु ।

अथे धकाः हाकनं विश्वकप फुटबलपाखें तापाक च्वनेफुम्ह नं मखु । मेमेगु फुटबल मस्वःसां विश्वकप स्वयेगु धाःसा मत्वःतू । ‘थौंकन्हय्या इलय् विश्वकप मस्वइपिं धयापिं हे सु दइ ?’ थःगु न्ह्यसःया लिसः थःम्हं हे बिइगु झ्वलय् वय्कलं धयादिल, ‘ई कथं ला न्ह्याः हे वनेमाल ।

संगीतय् गुलि लगाव दु, उलि फुटबलय् मदु । तर विश्वकप धाःसा पक्का नं स्वयेगु हे जुइ ।’फुटबलया फ्यान मखुगुलिं खास हे कासामित सु सु म्हितेत्यंगु धयागु नं मसिउ । ‘छुं छगू टिमया समर्थन यानाः फुटबल स्वयेगु जुइमखु । स्वस्वं वनेगु, अले गुगु टिमं बांलाक म्हितल, व हे टिमया सपोर्ट यायेगु’ जीवितया बिचाः दु ।

आःतक स्वयागु ल्याखं जीवितयात जर्मनी हे यः ताः । ‘उकिं शनिवाः जूगु फुटसलय् नं जर्मनीया हे टिसर्ट फिना वनागु’ वय्कलं धयादिल ।फुटबलय् इन्टे«स्ट मदुसां गथे म्हिते सःगु ले धयागु न्ह्यसलय् वय्कलं धयादिल, ‘सेन्ट जेभियर्सय् ब्वनागु, अन प्यंगू ला फुटबल मैदान हे दु । मचांनिसें स्वास्थ्यया निंतिं नं यःसां मयःसां न्हिं घौछि ला म्हिते हे माः । मचाबलय्या अनुभव धायेमाली ।’