उद्योग वाणिज्य महासंघय् गोल्छायात पनेगु दाऊ
येँ – नेपाल उद्योग वाणिज्य महासंघय् उद्योगी व्यवसायीतय् दथुइया ल्वापुया कारणं विधान हे संशोधन यायेगु ज्या जुयाच्वंगु दु । आः हाकनं छक्वः थथे हे विधान संशोधन जुइगु अवस्था ब्वलंगु दु । महासंघया पुलांम्ह अध्यक्ष चण्डी ढकाल व वर्तमान उपाध्यक्ष शेखर गोल्छाया दथुइ खँ मिले मजुइवं विधान संशोधन जुइत्यंगु खः ।
थुकिया निंतिं महासंघं याकनं हे विशेष साधारण सभा सःतेत्यंगु दु । विशेष साधारण सभां वरिष्ठ उपाध्यक्ष स्वतः मेगु कार्यकालय् अध्यक्ष जुइगु प्रावधानयात संशोधन यानाः अध्यक्षय् हाकनं निर्वाचन हे यायेमाःगु व्यवस्था यायेत्यंगु दु । उपाध्यक्ष गोल्छायात अध्यक्ष जुइगु पाखें पनेगु निंतिं हे पुलांम्ह अध्यक्ष ढकालं विधान संशोधनया खेल म्हिताच्वंगु खँ धाःगु दु ।
ढकालं वर्तमान अध्यक्ष भवानी राणायात दबाब हे बियाः याकनं विशेष साधारण सभा सतेत धयाच्वंगु दु । ढकालया संयोजकत्वय् दयेकूगु विधान संशोधन समितिं वरिष्ठ उपाध्यक्ष मेगु कार्यकालय् स्वतः अध्यक्ष जुइगु व्यवस्था खारेज सहितया प्रतिवेदन लःल्हायेधुंकूगु दु । तर थौंकन्हय्या अध्यक्ष भवानी राणा थः हे धाःसा वरिष्ठ उपाध्यक्ष स्वतः अध्यक्ष जुइगु प्रावधान पाखें अध्यक्ष जूम्ह खः ।
उबलय् नं भाष्कर राजकर्णिकार अध्यक्ष जुइगु अवस्था वयेवं थथे हे विधान संशोधन यानाः वरिष्ठ उपाध्यक्ष स्वतः अध्यक्ष जुइगु व्यवस्था याःगु खः । आः निम्ह व्यवसायीत ढकाल व गोल्छाया ल्वापुं हाकनं विधान संशोधन यानाः पुलांगु हे व्यवस्था कथं अध्यक्षय नं निर्वाचन यायेगु कथं विधान हयेत्यंगु खः ।
न्हूगु विधान संशोधनय् कार्यसमितिया पदावधि नं निदँ जक यायेगु प्रस्ताव हयेत्यंगु दु । न्हापा कार्यसमितिया कार्यकाल स्वदँया जुयाच्वंगु दु । थ्व विधान संशोधन छुं नं हालतय् पारित यायेगु निंतिं ढकाल लगे जुयाच्वंगु खँ धाःगु दु । ढकालयात मेपिं उपाध्यक्षत उमेशलाल श्रेष्ठ व किशोरकुमार प्रधानं नं साथ बियाच्वंगु खँ धाःगु दु ।
श्रेष्ठ व प्रधान निम्हं अध्यक्षया आकांक्षीपिं खः । मेखे अध्यक्ष राणा धाःसा विधान संशोधन हे याःसां थुकियात वइगु चुनावय् लागू मयायेगु पक्षय् दु । वय्कः गोल्छायात छगू कार्यकाल अध्यक्ष दयेकेधुंकाः जक थ्व व्यवस्था लागु यायेमाः धयागु पक्षय् दु ।
तर ढकाल धाःसा विशेष साधारण सभां हे पारित यानाः वइगु निर्वाचनय् हे लागू यायेमाः धयागु पक्षय् दु । तर छथ्वः धाःसा विशेष साधारण सभां विधान संशोधन पारित याये मिले मजू धयाच्वंगु दु । यदि विशेष साधारण सभां पारित यात धाःसा थुकिया विरुद्ध मुद्दा लायेफु धाःगु दु ।
LEAVE YOUR COMMENTS