साहित्य सम्मेलनय् बछि गैरनेवाः विद्यार्थी
येँ – म्हिगः थन जूगु छगू स्कूलस्तरीय नेपालभाषा साहित्य सम्मेलनय् गुलि नेवाः विद्यार्थी–तय्सं ब्वति काःगु खः उलि हे संख्याय् गैर नेवाः विद्यार्थीतय्सं नं ब्वति काल ।ईलोहं प्रकाशन प्रा.लि.या ग्वसालय्म्हिगः जूगु स्वनिगःव्यापी स्कूलस्तरीय नेपालभाषा साहित्य सम्मेलनय् ब्वति काःपिं कुल ७८ म्ह सहभागी मध्ये ३९ म्ह विद्यार्थी गैरनेवाः खः ।
स्वनिगःया थीथी स्कूलं वःपिं ७, ८, ९ व १० तगिंया गैर नेवाः विद्यार्थीतय्सं सम्मेलनय् ब्वति काःगु खः । ज्याझ्वलय् कविता, बाखं, निबन्ध आदि पाठ याःपिं गैरनेवाः विद्यार्थीत मध्ये निम्ह मुस्मां नं दुगु खः । महाँकाल माविया ख्वाहिस परविन व जुद्धोदय माविया रहमतुल्ला मिया मुस्मां समुदायया विद्यार्थी खः ।
अथे हे मेपिं गैरनेवाःत रौनियार, लोहार, रिमाल, तामाङ, गुप्ता, गौतम, घले, दास, लकान्ट्री, गुरुङ, न्यौपाने, सुनार, कार्की, थापामगर, पुरी, लामा, पाण्डे, जयसवाल आदि थर÷जातयापिं खः । ज्याझ्वलय् स्वनिगःया छगू दर्जन स्वयां अप्वः स्कूलतय्सं ब्वति काःगु खँ ग्वसाः खलःया दर्शनवीर शाक्यं कनादिल । कासाया निर्णायक मण्डलय् शरद कसाः, राजनलाल (रास) जोशी व इश्वरी मैंया श्रेष्ठ च्वनादीगु खः ।
न्हाप जूम्ह मुस्मां
कासाय् निबन्ध विधाय् ख्वाहिस परवीन महांकाल मावि न्हाप, सचेतना मानन्धर जगत सुन्दर ब्वनेकुथि लिउ, कञ्चन श्रेष्ठ कान्ति ईश्वरी मावि लियांलिउ व हपाः सिरपालय् हिसिला श्रेष्ठ श्री कुमारी मावि लाःगु दु ।
अथेहे कविताय् यजु जोशी श्री महाकाल मावि न्हाप, शेख सालेह कन्या मन्दिर मावि लिउ, रमिता न्यौपाने शान्ति निकुञ्ज मावि लियांलिउ व सुमिना शाही एकेडेमी अफ सेक्रेट हर्टयात हःपाः सिरपाः लाःगु दु ।
बाखनय् शशी कार्की कन्या मन्दिर न्हाप, रिजा महर्जन जगतसुन्दर ब्वनेकुथि लिउ, सुनैना शाक्य श्री महांकाल मावि लियांलिउ व सृष्टि शाही एकेडेमी अफ सेक्रेट हर्ट हःपाः सिरपाः त्याकूगु दु ।
LEAVE YOUR COMMENTS