धारा २७४ हे संशोधन यायेगु सहमति दु : श्रेष्ठ

येँ – नेपाल कम्युनिष्ट पार्टी व संघीय समाजवादी फोरम दथुइ संविधानया धारा २७४ संशोधन यायेगु सवालय् आन्तरिक सहमति जूगु खँ सीदुगु दु । संविधान संशोधन बारे नेकपालिसे निरन्तर वार्ता यानादीम्ह संसफोया सहअध्यक्ष राजेन्द्र श्रेष्ठं ‘नेपालभाषा टाइम्स’ यात कनादी कथं संविधान संशोधनया बुँदा तयार याइबलय् मेमेगु खँ नं दुथ्याकेगु ज्या जुइसां मूल रुपं संशोधन जुइबलय् धाःसा धारा २७४ हे संशोधन यायेगु आन्तरिक सहमति जूगु दु ।

संविधानया धारा २७४ पाखें यदि देशय् आः दुगु ७ गू प्रदेशय् मेगु प्रदेश थपे याये माल धाःसा थपे याये फइगु सम्भावना मदु । उकिं थ्व धारायात संशोधन यानाः कन्हय् आवश्यकता अनुसार प्रदेशया संख्या थपे याना वनेगु वातावरण दयेकेत्यनागु खँ वय्कलं कनादिल । खास यानाः पुलांगु एमालेया नेतात थ्व धारा संशोधन यायेत अनिच्छुक जुयाच्वंगु खःसां आः पार्टी एकता लिपा वय्कःपिं नं उकी सहमत जूगु दावी श्रेष्ठं यानादिल ।

म्हिगः नेकपाया निम्ह अध्यक्षपिं केपी ओली व पुष्पकमल दाहाल लिसें संसफोया अध्यक्ष उपेन्द्र यादव दथुइ गुगु सहमतिइ हस्ताक्षर जूगु खः उगु सहमति पत्र संसफों एमाले व माओवादीयात थनिं स्वला न्ह्यः हे बियातःगु खः ।

उगु सहमति लिपा आः संसफो नं सरकारय् दुहां वनीगु जूगु दु । तर संसफोपाखें सु सु सरकारय् वनी धइगु बारे धाःसा खँ जूगु मदुनि । संसफोयात निगू फुलमन्त्री व छगू राज्यमन्त्रीया सिट बिउगु दु । फुलमन्त्रीया लागिं अध्यक्ष यादव, सहअध्यक्ष श्रेष्ठ व महासचिव रामसहायप्रसाद यादवया नां वयाच्वंगु दु । थ्व स्वम्ह मध्ये निम्ह मन्त्री जुयादीसा राज्यमन्त्री मिसाम्ह जुइगु सम्भावना दु । मन्त्री जुइगु सवालय् संसफो दुने आः छुं खँ पिहां मवःनिसां थ्वहे विषयय् विवाद ब्वलनेफुगु खँ सूत्रं धाःगु दु । थ्व स्वयां न्ह्यः नं संसफो सरकारय् वनीगु खँ पिहां वःबलय् सु सु मन्त्री जुइगु खँय् पार्टी दुने हे कचवं पिहां वःगु खः । तर सहअध्यक्ष श्रेष्ठं थुगुसी अज्याःगु विवाद मजुइगु दावी यानादिल ।

सम्बन्धित बुखँ

LEAVE YOUR COMMENTS