देय्या कुंकुलामं आइएमई–पेया सेवा कायेफइ
लोकंह्वाःगु बैंकिङ पुचः आइएमई पाखें थ्यंमथ्यं दछि न्ह्यवनिसें नेपाल राष्ट्र बैंकं स्वीकृति कयाः ई–भुक्तानी सेवा ‘आइएमई पे’ संचालनय् हःगु दु । आइएमई–पेया बारे आइएमई डिजिटलया चिफ अपरेटिङ अफिसर डानियल दास श्रेष्ठलिसे शुक्रवाःया तँसापौपाखें तेज महर्जनं यानादीगु खँल्हाबल्हा ।
ई–पे धाःगु खास छु खः ?
विद्युतीय (इलेक्ट्रोनिक) माध्यमं भुक्तानी यायेगु हे ई–पे खः । छिगु खल्तीइ मोबाइल छगः दत धाःसा थ्व हे मोबाइलया माध्यमं छुं नं सामान न्यायेबलय्, बिलया ध्यबा पुलेबलय् भुक्तानी यायेफइ । थथे मोबाइलया माध्यमं भुक्तानी यायेगुयात हे ई–पे धाइगु खः । जिमिसं संचालन यानाच्वनागु ‘आइएमई–पे’ थथे हे विद्युतीय माध्यमं भुक्तानी यायेफइगु सेवा खः ।
आइएमई–पें छु गज्याःगु सेवा बिया वयाच्वंगु दु ?
– आइएमई–पे पाखें आःयात मुख्यतः स्वंगू कथंया सेवा बिया वयाच्वंगु दु । ध्यबा ट्रान्सफर यायेगु, बिल भुक्तानी यायेगु व रिचार्ज यायेगु । ध्यबा ट्रान्सफर यायेगु धकाः छिं थःगु मोबाइलपाखें हे छगू बैंकया खातां मेगु बैंकय् ध्यबा ट्रान्सफर यायेफइ । आइएमई–पे डाउनलोड यानाः सामान्य कारोबार याइपिंसं छक्वःया न्यासः व लछिया अप्वलय् न्याद्वः तका तक ध्यबा ट्रान्सफर यायेफइ ।
अथे हे केवाईसी फर्म जायेकाः कारोबार यात धाःसा छक्वःया न्याद्वः व लछिया अप्वलय् नीन्याद्वः तकया कारोबार यायेफइ । केवाइसी फर्म नं अनलाइनपाखें हे भरे यायेफइ ।अथे हे बिल भुक्तानी सेवा पाखें मत, लः, टेलिफोन निसें अनलाईन सामान न्यायेबलय् बिल भुक्तानी यायेफइसा रिचार्ज सेवापाखें मोबाइल रिचार्ज यायेगु निसें टेलिभिजन सेटअप बक्स, इन्टरनेट सेवा आदि रिचार्ज यायेफइ ।राष्ट्र बैंकं थौंकन्हय् नोटया कारोबार म्हो याना यंकेगु नीति हयाच्वंगु दु, थज्याःगु अवस्थाय् लछिया जम्मा नीन्याद्वः तक जक
कारोबार यायेफइ धयागु तसकं म्हो मखुला ?
– छगू ल्याखं स्वयेबलय् थ्व ध्यबा धयागु म्हो हे खः । तर जितः ताः आःयागु अवस्थाय् थ्व नं बांलाःगु हे खँ खः । छक्वलं नोटयात विस्थापित याये धयां यायेफइमखु । मनूतय्के ई–पेया बारे बांलाक जानकारी हे मदुनि, अथे हे गुकथं चले यायेगु धयागु नं बांलाक जानकारी मदुनि ।
थज्याःगु अवस्थाय् छक्वलं यक्व कारोवार जुल धाःसा गलत कारोबार नं जूवनीगु खतरा दइ । उकिं आःया अवस्थाय् सुरुवात बां हे लाः । नोट विस्थापित यायेगु निंतिं ई काइ, थुकिया निंतिं फुक्क संयन्त्रं बांलाक ज्या यायेमानि । बुलुहुं जुयावनी ।
थज्याःगु अवस्थाय् आइएमइ–पें थःगु बजाः गुकथं विस्तार याना यंकाच्वंगु दु ले ?
– जिपिं छक्वलं ह्वात्त हे बजाः विस्तार याये धकाः न्ह्याः वनाच्वनागु मदु । दकलय् तःधंगु खँ ई–पे बारे सर्वसाधारणयाके बांलाक जानकारी दयेमाल । गुकथं चले यायेगु धयागु सिइकेमाल । जिमिसं दकलय् न्हापां ग्राहकतय्त थुकिया बारे थुइकेबीगु निं कुतः यानाच्वनागु दु ।
थुकिया निंतिं जिमिके दकलय् तःधंगु फाइदा छु दु धाःसां आइएमई ब्रान्ड न्हापांनिसें हे लोकंह्वाःगु ब्राण्ड खः । आइएमई रेमिटेन्सया देन्यंकं द्वलंद्वः एजेन्ट्स दु । उमिगु पाखें हे आइएमई–पेया बारे ग्राहकयात थुइके बीगु ज्या यानाच्वनागु दु ।
नेपाली बजारय् मेमेगु नं ई–पे सेवा उपलब्ध दु । मेमेगु सेवा स्वयां आईएमई–पेया फरक विशेषता छु दु ?
– जिं न्हाचः नं धायेधुन, आइएमई नेपाःया लोकंह्वाःगु ब्राण्ड खः । आइएमई रेमिटेन्सया देन्यंकं थःगु हे सञ्जाल दु, एजेन्ट्स दु । बैंकिङ सेवा बांलाक मथ्यंगु देय्या कुंकुलामय् तक थ्यनाच्वंपिं थुपिं एजेन्ट्सतय् मार्पmत आइएमई पेया सेवा कायेफइ ।
विदेशय् च्वनाच्वंपिंसं नं आइएमई पे मार्फत रेमिट्यान्स छ्वये थें थःम्हं ध्यबा छ्वयेमाःम्हेसिया मोबाइल वालेटय् ध्यबा याउँक ट्रान्सफर यानाबीफइ । थुकिया लिसें ‘जि टु पी’ (गभर्मेन्ट टु पिपुल) या सेवा बीगु नं तयारी यानाच्वनागु दु ।
‘जि टु पी’ धाःगु छु खः ?
ई–पेपाखें ‘पिटुजी’ (पिपुल टु गभर्मेन्ट) व ‘जिटुपी’ (गभर्मेन्ट टु पिपुल) या निगू कथंया सेवा नं कायेफइ । थौंकन्हय् अप्वः थें ई–पेय् पिपुल टु गभर्मेन्ट सेवा जुयाच्वंगु दु । थुकिया मतलब सर्वसाधारणं सरकारयात यायेमाःगु भुक्तानी, गथेकि मतया बिल, लःया बिल, कर पुलेगु आदि सेवा मेमेगु ई–पेपाखें बियावयाच्वंगु दु । आईएमई पे पाखें धाःसा गभर्मेन्ट टु पिपुल अथे धयागु सरकारपाखें सर्वसाधारणयात बीमाःगु भुक्तानी नं बीगु तयारी जुयाच्वंगु दु ।
गथेकि सामाजिक सुरक्षा भत्ता धाये । थ्व स्थानीय तहया सरकारपाखें सर्वसाधारणयात बीगु खः । थज्याःगु ध्यबा आः तप्यंक थःथःगु मोबाइलय् वइगु सुविधा बीगु निंतिं जिमिसं तयारी यानाच्वनागु दु । अथे हे जिमिसं ‘बल्क पेमेन्ट’ धकाः एकमुष्ट ध्यबा ट्रान्सफर यायेफइगु सेवा बियाच्वनागु दु । गैरसरकारी संस्थांतय्सं गांगामय् एकमुष्ट ध्यबा छ्वयेमाल धाःसा नं आइएमई पेपाखें थज्याःगु सेवा कायेफइगु कथंया परीक्षणया ज्या जुयाच्वंगु दु ।
LEAVE YOUR COMMENTS