ख्वप नपाया जनप्रतिनिधितय् दछिया समीक्षा
ख्वप – ख्वप नगरपालिकाय् जनप्रतिनिधितय्सं पदभार ग्रहण याःगु दछि क्यंगु लसताय् नःपुखू बैंक्वेटय् ‘जनप्रतिनिधितय्गु दछि’ विषयय् ख्वप नगरपालिकां छगू विशेष ज्याझ्वः यात ।ज्याझ्वलय् नेपाल मजदुर किसान पार्टीया केन्द्रीय अध्यक्ष नारायणमान बिजुक्छेँ रोहितं नगरपालिकाय् ज्या सनाच्वंपिं निसःम्ह कर्मचारीत मध्ये छनौट समितिं उत्कृष्ट ल्यःपिं झिम्ह कर्मचारीतय्त म्हतिं झिद्वः झिद्वः तका दां नापं हनापौ लःल्हासें हनेज्या यानादिल ।
समारोहय् मूपाहांया थासं नवानादिसें वय्कलं नेमकिपाया घोषणापत्रकथं ज्या यानाच्वंगुलिं नगरपालिकाया बोर्डयात सुभाय् देछानादिसें ख्वप नगरयात थःपिंसं सांस्कृतिक नगर दयेकेगु निंतिं २०६८ सालय् हे सदनय् ‘सांस्कृतिक नगर सम्वन्धी विधेयक’ दर्ता यानागु न्ह्यथनादिसें उगु विधेयकय् सांस्कृतिक नगर दयेकेत पिनेया मनूतय्त अचल सम्पत्ति न्याये—मी याये मदइगु प्रावधान दुगुलिं उगु विधयेक हे सदनय् हयेके बिउगु खँ कनादिल ।
वय्कलं ख्वप देय्यात गुकथं व्यवस्थित याना तयेफइ धइगु धारणां जक थःपिंसं ख्वपय् पिनेयापिं मनूतय्त जग्गा न्याये–मी मयाकेत स्वयागु खँ न्ह्याथनादिसें थज्याःगु चलन जःलाखःला देय् भारतया काश्मिर, सिक्किम लगायत आपालं समाजवादी देसय् दुगु धासें छगू थासय् च्वंपिं मनूत मेगु थासय् वनाः व्यापार व्यवसाय यानाः च्वनाच्वने मदइगु बन्दोबस्त दुगु खँ कनादिल ।
ज्याझ्वलय् सभापतिया थासं नगरया थीथी ६७ गू उपभोक्ता समितिया संयोजकतय्त सुभाय्–पौ लःल्हानादिसें ख्वप नगरपालिकाया मेयर सुनिल प्रजापतिं केन्द्रीय सरकारं संघीयताया मर्म अःखः एकात्मकशैलीं हे ज्या यायेगु सोच तयातःगुलिं स्थानीय तहय् जनप्रतिनिधितय्त ज्या यायेत हे मछिनाच्वंगु खँ कनादिल । पुलांम्ह सांसद अनुराधा थापामगरं सिद्धान्तय् अडिग ख्वप नगरपालिकां आत्मनिर्भर जुयाः मेपिंसं स्वयां फरक व नमूनाकथं ज्या यानाच्वंगुलिं मेपिंत नं थुगु नगरपालिकां प्रेरित यानाच्वंगु खँ कनादिल ।
ख्वपया प्रमुख जिल्ला अधिकारी नारायणप्रसाद भट्टं विश्वव्यापी रुपं थःगु पहिचान कायम यायेत लालायित जुयाः फरक राजनीतिक संस्कारं ख्वपय् ज्या जुयाच्वंगु न्ह्यथनादिसें ख्वप देय् चीधंगु नगर व जिल्ला थें खने दुसां थ्व नगर आपालं ल्याखं महत्वपूर्ण जूगु खँ कनादिल । त्रिभुवन विश्वविद्यालयया शिक्षा संकायया पुलांम्ह डीन प्रा. पृथुचरण वैद्यं ज्याथजिथिपिंत विचाः यायेत नर्सया बन्दोबस्त याःगु व शिक्षा लागाय् स्थानीय पाठ्यक्रम तयार यानाः ख्वप नगरपालिकां मेपिंसं मयाःगु थेंज्याःगु नमूना ज्यायात कयाः च्वछायादिल ।
लिसें वय्कलं पर्यटकत चाःहिउ वइगु इलय् थाय्थासय् शौचालयया बन्दोबस्त मजूगु व खुल्ला लागा त्वतेमाः धइगु खँय् ध्यान मतःगु खँय् धाःसा आलोचना यानादिल । संस्कृतिविद् तेजेश्वरबाबु ग्वगलं युगकथं न्हूगु संसारय् दुहां वनेगु अत्यावश्यक जुइधुंकूगु न्ह्यथानादिसें असहजताया दथुइ नं न्ह्यज्यानाः ख्वप नगरपालिकां थीथी उपलब्धि हासिल यानाच्वंगु बांलागु पक्ष खः धयादिल ।
इतिहाविद् प्रा.डा. पुरुषोत्तमलोचन श्रेष्ठं मेमेगु नगरपालिकाया तुलनाय् ख्वप नगरापलिकां ऐतिहासिक सफलता हासिल यानाच्वंगु कनादिसें नेपालमण्डल लागा सांस्कृतिक राजधानी जूगु ल्याखं उकियात थुकथं हे कायम यानातयेत सलंसः दँ न्ह्यःनिसेंया थनया स्थानीय कला, शीप, संस्कृति व परम्परायात जीवन्त याना तये फयेकेमाः धयादिल ।
३ नम्बर प्रदेशया सांसद सुरेन्द्र्रराज गोसाईनं संघीयता मन, मस्तिटष्कय् मवःसां ख्वप नगरपालिका अग्रगमणया यात्राय् तीव्र ढंगं न्ह्याः वनाच्वनीगु आशा यानादिल । महानगरीय प्रहरी परिसर ख्वपया प्रमुख प्रहरी उपरीक्षक (एसपी) हिमालयकुमार श्रेष्ठं नं भिंतुना देछानादीगु ज्याझ्वलय् ख्वप नगरपालिकाया उपमेयर रजनी जोशीं लसकुस यानादीगु खःसा ज्याझ्वः ९ वडा अध्यक्ष रविन्द्र ज्याख्वलं न्ह्याकादीगु खः ।
थ्व हे झ्वलय् निर्वाचित जनप्रतिनिधिपिंसं ख्वप नगरपालिकाय् थःपिं निर्वाचित जुया वयेधुंकाः थ्व दछिया दुनेया कार्यभारयात कयाः छगू समीक्षा ज्या नं जुल । नःपुखू बैंक्वेटय् हे जूगु ज्याझ्वलय् ख्वप नगरपालिकाया मेयर सुनिल प्रजापतिं थःपिसं छुं छुं ज्या याये धाःसां नं याये मफयाच्वंगु खँ स्वीकार यानादिसें आपालं ज्या छक्वलं न्ह्याकेमाःगु जुयाः मनय् तया थें ज्या याये मफयाच्वंगु खँ कनादिल ।
LEAVE YOUR COMMENTS