नवदुर्गया ५६ न्हुया यात्रा सुरु

फाइल किपा- नृपेन्द्रलाल श्रेष्ठ

ख्वप– थनया नांजाःगु नवदुर्गा द्यः प्याखं म्हिगःनिसें न्ह्यात । ख्वपया सूर्यमढी त्वालं थ्व प्याखं न्ह्याःगु खः । प्याखं सुरु याये न्ह्यः म्हिगः बहनी अन द्यः हयाः पूजा फयेगु ज्या जूगु खः । नवदुर्गाया न्या लाकेगु ज्या यायेत माःम्ह मूबाहां कथं तयातःम्ह फाचा धाःसा सोमवाः चान्हय् ब्रम्हायणी रोडय् लाःगु नवदुर्गाया जग्गा जःखः त्वतूगु खः । अन ‘लियो लियो पायो पायो ’ धाधां मूबाहां लिकेगु ज्या याःगु खः ।
द्यः गणयात अन छ्यनय् न्याकाः भागि याकीगु खःसा सार्वजनिक रुपं छगः तःसियात आकासय् वांछ्वयाः उगु तःसि लाये फुम्हे सित पुत्रलाभ जुइ धइगु विश्वास यानातःगु दु । म्वःम्वः मनूतय् सहभागीतय् दथुइ स्वघौ तक जूगु उगु ज्याझ्वलय् द्यःगणयात अभिनन्दन याःगु खः ।
आः थ्वहे वइगु भलभल अष्टमि तक ख्वपया नीछगू थासय् नवदुर्गा प्याखं ल्हुके गु ज्या जुइ । सूर्यमढी त्वालं सुरु जुइगु थ्व न्या लाकेगु जात्रा खौ मात्वालय् थ्यंकाः क्वचाइ । ५६ न्हु तकया यात्रा लिपा नवदुर्गां जलसमाधि काइ । म्हिगः सूर्यमढी धुंकाः थौं दत्तात्रय व कन्हय् क्वाठण्डौ त्वालय् न्या लाकीगु ग्वसाः दु ।