बुधवाः व बिहिवाः इतिल्हने सम्यक

यल (नेपालभाषा टाइम्स)÷ थ्व हे वइगु चिल्लाथ्व चौथि व पंचमी (फागुन ३० व चैत्र १ गते) निन्हुयंकं यल इतिल्हन सम्यक महादान पर्व जुइगु जूगु दु । ‘दिपंकर पर्व’ धकाः नं धाइगु थुगु सम्यक पर्व हिरण्यवर्ण महाविहारया ग्वसालय् जुइ ।

हिरण्यवर्ण महाविहारया स्वर्ण देगः दयेकूम्ह जुजु भाष्करदेवया सन्तति भलिभारों ‘त्रिरत्नया सुवालं धन चूलाःगु’ जुयाः बुद्धप्रति कृतज्ञ जुयाः श्रद्धावदानया तातुनां थीथी विहारया दिपंकर बुद्ध, तारा व मेमेपिं बौद्ध द्यःपिंलिसें श्रामणेर, ब्रम्हचर्य भिक्षु, शाक्यभिक्षु व बज्राचार्य गुरुजुपिंत ब्वनाः दकलय् न्हापां सम्यक महादान पर्व ग्वसाः ग्वःगु धापू दु ।

ग्वसाः खलःपाखें पत्रकार सम्मेलन यानाः बिउगु जानकारी कथं सम्यकसम्यकया मू न्हि बुधवार यलया झिंच्यागू मूबहाः, बही, वादेय् (चापागाउँ), बुंग, किपू,येँ, यल, ख्वपया बहाःबहिलिं दिपंकर बुद्ध, आर्यतारा व मेमेपिं सम्यक द्यःपिं बहनीसिया७ ताः इलंनिसें यल लाय्कुलिइ मुंकेगु ज्या जुइ । बहनीसिया ९ताः इलय् ज्येष्ठवर्ण महाविहार तंगःबहालं श्री वसुन्धरा देवी द्यः यल लाय्कुलिइ हइ, अनंलि सकल दिपंकर बुद्ध व मेमेपिं द्यःपिंत लस्करं यल लाय्कुलिं सम्यक महादान स्थल नागबहालय् यंकी ।

सम्यक महादान जुइगु न्हि बिहिवाः सुथसिया ४ बजेनिसें न्हिनसिया १ बजेतक श्रद्धालु भक्तजनपिंपाखें दिपंकर बुद्ध व मेमेपिं द्यःपिनिगु पूजा व दर्शन याकेगु ज्या जुइ । थुगु पर्वया नितिं अक्षयकोष नीस्वना बिउगुलिं यल महानगरपालिकायात हनेगु ज्याझ्वः नं थुबलय् हे जुइ । थ्व लिपा न्हिनसिया २ ताः इलंनिसें ४ ताःईतक भूमिशोधन पूजालिसें दान बीगु ज्या जुइसा सनिलया ५ ताः इलय् द्यःपिंत थःथःगु विहारय् लिहां बिज्याकीगु ज्या जुइ । थुगु परम्परा ७७३ दँ न्ह्यः निसें न्ह्यानाच्वंगु खः ।

सम्बन्धित बुखँ

LEAVE YOUR COMMENTS