ने. सं. ११४३ चौलाथ्व पारू -

अध्यादेश संशोधन जूसां खोप हयेत अनकुल मजूनि

येँ (नेपालभाषा टाइम्स) – सरकारं नेपालय् कोरो ना भाइरस विरुद्धया खोप अःपुक दुत हयेगु निंतिं वासः सम्बन्धी अध्यादेश संशोधन याःसां खोप हयेगु निंतिं थ्व जक पर्याप्त मजूगु खँ विज्ञतय्सं धाःगु दु ।

राष्ट्रपति विद्यादेवी भण्डारीं वंगु मंसिर ३ गते वासः (स्वक्वःगु संशोधन) अध्यादेश जारी याःगु खः । थ्व अध्यादेश कथं विदेशय् आपतकालीत छ्यलाबुलाया निंतिं अनुमति बीवं थज्याःगु वासः नेपालय् नं हये दइ । अथेहे थ्व अध्यादेश कथं विदेशय् सरकारी व निजीस्तरय् परीक्षणय् दुगु कोभिड १९ या खोपया परीक्षण नेपालय् नं यायेदइगु व्यवस्था याःगु दु ।

थौंकन्हय् थीथी कम्पनीं दयेकाच्वंगु कोभिड १९ सम्बन्धी खोप ९० प्रतिशतं मल्याक लिच्वः सकारात्मक वःगु समाचार पिहां वयाच्वंगु इलय्थ ज्याःगु खोप ने पालय् हयेत थ्व अध्यादेशं कानुनी पंगः चिइकाबिउसां ने पालय् खोप हयाः तयेगु निंतिं थाय् हे व्यवस्था मजूनिगुलिं थ्व अध्यादेश जक वयां कुमगाःगु खँ विज्ञतय् धापु दु ।

स्वास्थ्य सेवा विभागया हे पुलांम्ह महानिर्देशक डा. सुशीलनाथ प्याकुरेलं धयादीगु दु, ‘कोभिडया आः सफल परीक्षण जूगु खोप धकाः गुगु खँ वयाच्वंगु दु, व खोप हयेबलय् उकियात तापक्रम मिले यानाः तयेमाः । तर थज्याःगु खोप हयाः भण्डारण यायेगु निंतिं आवश्यक फ्रिज स्वास्थ्य मन्त्रालययाके मदु । उकिं कानुनी रुपं खोप हयेत लँ ला चायेकाबिउगु, तर खोप तयेथाय् हे मदुगुलिं तुरुन्त खोप हयेफइगु अवस्था धाःसा मदु ।’

थौंकन्हय् अमेरिकी कम्पनी फाइजर व जर्मन कम्पनी बायोएनटेकं विकास याःगु धयातःगु खोप माइनस ७० डिग्री तापक्रमय् तयेमाः धयातःगु दु । थ्व खोप हयेगु खःसा थुकिया भण्डारण यायेगु क्षमता नेपाःयाके मदुगु खँ सरकारी अधिकारीतय्सं हे धायेधुंकूगु दु । ‘खोप अःपुक हयेफइगु कानुनी व्यवस्था ला यात, तर न्याना हयाः नं तयेगु व्यवस्था हे मयायेगु खःसा उकिया छु अर्थ ?’ भाजु प्याकुरेलं धयादीगु दु । वय्कलं देय्न्यंकं थ्व खोप गुकथं थ्यंकेगु धयागु योजना दयेकेगु ज्या तक हे जूगु थःम्हं मसिउनिगु खँ धयादीगु दु ।

अथेहे आः हःगु अध्यादेशं नेपालय् खोप परीक्षण नं यायेदइगु व्यवस्था याःगु खँयात नं डा. प्याकुरेलं अःखतं खुसि न्ह्याकूगु टिप्पणी यानादीगु दु । न्हापा हे यायेमाःगु ज्या आः वयाः याःवःगु धासें वय्कलं धयादीगु दु, ‘जिमिसं न्हापा हे नेपालय् नं कोभिड १९ या अनुवंशिय विश्लेषण यायेमाल धया वयाच्वनागु खः, तर उबलय् सुनां वास्ता मयाः ।’