कन्हय् निसें हिजो आजका कुरा
येँ (नेपालभाषा टाइम्स)÷ सन्तोष पन्तया लोकंह्वाःगु टेलिश्रृङ्खला हिजो आजका कुराया फिल्मी भर्सन शुक्रवाः निसें प्रदर्शनय् वइगु जूगु दु । येँय् बुधवाः छगू पत्रकार सम्मेलन यासें फिल्मया निर्देशक साकार पन्तं थः अबु सन्तोष पन्तं दयेकूगु टेलिश्रृङ्खलाया सवाःयात छुं नं मपाकः फिल्मी भसर्नय् हिजोआजका कुरायात हयागु खँ धाल ।
वय्कलं धयादिल, ‘थुकी फिल्मय् दयेमाःगु फुक्क गुणत दइ, तर उबलय्या टेलिभिजनय् स्वयेगु हिजोआजका कुराया सवाः पाइमखु । आः दयेकागु फिल्मय् नं अबलय् थें हे हास्य व व्यंग्यपाखें थौंकन्हय्या समाजयात न्ह्यब्वयागु दु ।’
फिल्मया बाखं कथं स्वनिगलय् च्वंपिं प्यंगू परिवारया सुख, दुःखया बाखंयात न्ह्यब्वयातःगु दु, थुकी नेपालभाषाया लोकंह्वाःगु कलाकार सविन शाक्य थनया नेवाः परिवारया प्रतिनिधित्व यानाः फिल्मय् खनेदयेकः वयेत्यंगु दु ।
पत्रकार सम्मेलनय् न्ववासें शाक्यं थःत कलाकारीता क्षेत्रय् हे सन्तोष पन्तं हःगु खँ कँसें फिल्म दयेकूबलय् नं थःत लुमंकूगुलिं पन्तयात सुभाय् देछाल ।
अथे पन्तं काय निर्देशनय् फिल्म म्हितेदुगुलिं थःत गर्व ताः धासें न्हापा साकारयात सन्तोषया काय धकाः म्हसीकीगु खःसा आः थःत साकार पन्तया अबु धकाः म्हसीके दयाः लय्तावः धाल ।
अथेहे फिल्मया छायाकार रवि साय्मिं ‘हिजोआजका कुरा’यात टेलिभिजनया पर्दा फिल्मी पर्दाय् हयेगु निंतिं छुं कथं नं कमी मयानागु खँ धयादिल ।
फिल्मय् सन्तोष पन्तया लिसें रमा थपलिया, सविन शाक्य, मञ्जु श्रेष्ठ, रिचा शर्मा, रिमा विश्वकर्मा, साकार पन्त, अनुष्का अधिकारी, विनायक कुँइकेलया मू भूमिका दु ।
फिल्मय् संगीत हर्कुलस बस्नेतया दुसा प्राविधिक पक्षय् सम्पादन÷कलर÷ग्राफिक्स विनय कंसाकारं, पाश्र्व संगीत भुपेन्द्र वज्राचार्य, साउण्ड मिक्सिङ बिजु कर्माचाय्या दु ।
LEAVE YOUR COMMENTS