गुण फिल्मस्या स्वंगूगु देछा संकिपा ‘कर्म’
येँ – गुण फिल्मसं बौद्ध बाखंया लिधंसाय् स्वंगूगु नेपालभाषा संकिपा ‘कर्म’ निर्माण याइगु जूगु दु । म्हिगः जूगु संकिपाया भिं–साइत ज्याझ्वलय् उकिया जानकारी बिउगु खः । थ्व स्वयां न्ह्यः गुण फिल्मसं हे बौद्धकालीन बाखंया लिधंसाय् निर्माण याःगु पटाचारा व कृषा गौतमीया निर्देशन यानादीम्ह नांजाःम्ह निर्देशक रामकृष्ण खड्गीं हे थुगु संकिपाया नं निर्देशन यानादीत्यंगु दुसा संकिपाया पटकथा व संवाद नं वय्कलं हे च्वयादीगु खः ।
गुण फिल्मस्या नायः राजेन्द्र शाक्य (दिजेन्द्र)या सभापतित्वय् जूगु संकिपाया भिं–साइत ज्याझ्वलय् कर्म संकिपाया निर्माता तकं जुयादीम्ह शाक्यं नैंक्याः तछ्यानादीगु खःसा मूपाहां जनकवि दुर्गालाल श्रेष्ठं क्यामराया स्वीच अन यानादीगु खः । ज्याझ्वःया मेम्ह मूपाहां ख्यालिजुजु मदनकृष्ण श्रेष्ठं निर्देशन बियादीगु खःसा थ्व पटाचारा व कृषा गौतमीया नायिका मेलिना मानन्धरं क्ल्याप बियादीगु खः ।
ज्याझ्वलय् संकिपाया नायक कर्मा शाक्य व नायिका आशिष्मा नकःमिं संकिपाया छगू संवाद नवानाः शुभमुहूर्त यानादीगु खः । भिक्षु निग्रोध महास्थविरपाखें पंचशील बियाः न्ह्याःगु ज्याझ्वलय् निर्माताया शाक्यया छेँजःपिंसं बुद्धपुजा नं यानादीगु खः । निर्देशक खड्गीं लसकुस यानादीगु ज्याझ्वलय् संकिपाया थीथी पक्ष नापं आः दयेकेत्यंगु संकिपाया नं सफलताया कामना यासें भिक्षु निग्रोध महास्थविर, जनकवि श्रेष्ठ व ख्यालिजुजु श्रेष्ठ, वरिष्ठ सिने पत्रकार विजयरत्न असंबरें थःथःगु नुगःखँ तयादीगु खः ।
उगु हे ज्याझ्वलय् कृषा गौतमी संकिपा ख्वीच्यान्हुतक सफलतापूर्वक प्रदर्शन जूगु लसताय् संकिपाया कलाकार, प्राविधिक व ग्वाहालिमिपिंत लुमन्ति चिं नं लःल्हाःगु खः ।
ज्याझ्वःया सभापतिलिसें संकिपाया निर्माता शाक्यं पटाचारा व कृषा गौतमी व्यावसायिक ल्याखं लबः कायेगु निंतिं संकिपा दयेकागु मखसे नेपालभाषाया निंतिं छुं यायेमाः धइगु सोच व उकिसनं बौद्धकालीन बाखंयात न्ह्यःने हयेगु ल्याखं संकिपा निर्माण यानागु धासें निगुलिं संकिपापाखें वःगु ध्यबा थीथी विहार, स्तुपा, चैत्य निर्माणया निंतिं ग्वाहालि यानागु नं जानकारी बिउगु खः ।
कर्मा व आशिष्माया मू भूमिका दइगु संकिपाया निंतिं मेपिं कलाकार धाःसा ल्ययेगु ल्यं दुगु व थ्व हे फागुनया अन्तिम वालंनिसें शुटिंग शुरु यायेगु ग्वसाः दुगु निर्देशक खड्गी जानकारी बियादीगु दु ।
LEAVE YOUR COMMENTS