केन्द्रीय विभागय् सफू पितब्वज्या

यल – नेपालभाषा केन्द्रीय विभागय् महाकवि सिद्धिदास महाजुया १५१ क्वःगु बुदिंया लसताय् सफू पितब्वज्या नापं विदाइ ज्याझ्वः जुल । विभाग व लुमन्ति दबूया मंकाः ग्वसालय् उगु ज्याझ्वः जूगु खः । यल महानगरपालिकाया मेयर चिरिबाबु महर्जन मूपाहांकथं व पूर्व राज्यमन्त्री तीर्थराम डंगोल विशेष पाहांकथं झायादीगु ज्याझ्वलय् ‘लुमन्ति दबू’ व ‘गंप्याखंनय् लोकपक्ष’ नांया निगू सफू पित ब्वज्या याःगु खः ।

विभागया प्रमुख प्रा. डा. ओमकारेश्वर श्रेष्ठया सभापतित्वय् जूगु ज्याझ्वलय् विभागया हे झिंखुम्ह स्यनामिपिंसं न्ह्यब्वःगु अभिमुखीकरण ज्याझ्वःया ज्यापौ मुनाः लुमन्ति दबू पिथनागु दबूया नायः किरण केन रंजितं जानकारी बियादीगु खः । अथे हे गंप्याखनय् लोकपक्ष सफूयात कयाः च्वमिलिसें पाटन संयुक्त क्याम्पसया स्यनामि दिलीप जोशीं कनादीगु खः ।