ने. सं. ११४४ कछलागा सप्तमी -

सोनालीया छ्यनय् सँ !

अमेरिकाय् थःत जूगु गम्भिर प्रकृतिया क्यान्सरं वासः याकाच्वंम्ह बलिउड अभिनेत्री सोनाली बेन्द्रे ल्वय्नाप ल्वायेगु ल्याखं सामाजिक संजालय् अतिकं सक्रिय जुयाच्वंगु दु । छुं दिं न्ह्यः जक केमोथेरापी याःगु इलय् वया सँ दक्वं हाया वंगु खः । सोनालीं उकिया किपा सामाजिक संजालय् सेयर याःगु खः ।

गुकी वयागु सँ पाच्चुक खानातःगु थें खने दुगु खः । सोनाली हाकनं छपाः लिपांगु किपा सार्वजनिक याःगु दु । गुकी वयागु सँ ताःहाकः जुयाच्वंगु खंके फइ । थुकिं छता खँ छु सी दत धाःसा केमोथेरापी हाया वःगु सोनालीया सँ हाकनं बुया वःगु दु । सोनालीया सँ हाया पाच्चसे च्वंगु छ्यं खं बलय् वया प्रशंसकत छझाः स्तब्ध नं जूगु खः ।

तर लिपांगु इलय् वं सार्वजनिक याःगु मेगु किपातं वया प्रशंसकयात राहत चूलाःगु दु । सानोलीं सार्वजनिक याःगु किपाय् वयागु सँ ताःहाकः जुयाः सर्लक्क च्वनाः तसकं छाँट वंगु खनेदु । वास्तविकता छु धाःसा सोनालीया सँ सक्कलि मखसे नक्कलि खः । अर्थात व ‘विग’ तयातःगु खः ।

‘सुन्दर खने दयेके सुया मयइ ? थ्व न्ह्याम्हेसियागु नं इच्छाया खँ खः । उकिया निंतिं छुं भचा पाप यात धाःसा व गलत जुइमखु । यदि छिं नं यानादीगु इच्छा दुसा यानादिसँ ’ सोनालीं धाःगु दु, ‘सुन्दर खने दयेकेत विग जक तःसा गाः मेगु छुं नं समाः यानाच्वनेम्वाः ।’
सोनालीं बलिउड नायिका प्रियंका चोपडाया सल्लाहकथं विग तःगु खः ।