मृत्यु संस्कारया वैज्ञानिकता बारे गोष्ठी

येँ (नेपालभाषा टाइम्स) / नेवाः समाजय् गुंलानिसें मोहनि न्ह्यः सोह्र सराद्ध तक वइगु नखःचखःत मृत्यु संस्कारलिसे अप्वः बः बियातःगु जुयाच्वंगु दु । थुकियात हे स्वानाः मखं बहालय् रत्नकीर्ति महाविहार अध्ययन मण्डलं भाद्र महिनाया थःगु नियमित गोष्ठी ज्याझ्वलय् ‘बिज्ञानया दृष्टिकोणं मृत्यु संस्कार क्रिया’ बिषयय् ज्याझ्वः यात । थ्व विषयय् चिकित्सकया रुपय् ज्या याना वयाच्वनादीम्ह सह प्रा.डा मंगेश बज्राचार्यपाखें थःगु प्रस्तुति बियादीगु खः ।
नेवाः समाजय् मनू सी धुंकाः याइगु संस्कार थौंया विज्ञानलिसे गुलि सम्बन्ध दु धयागु खँय् प्रमाण बीगु ज्या उगु ज्याझ्वलय् जूगु खः । अध्ययन मण्डलया कजि जितेन्द्रबिलास बज्राचार्यया नायःसुइ न्ह्यःागु उगु ज्याझ्वःयात रबिन्द्र बज्राचार्यं लसकुस यानादीगु खः । ज्याझ्वलय् न्ह्यब्वगु बिषययात कयाः लुम्बिनी विश्वविद्यालयया पूर्व उपकुलपति प्रा.डा हृदयरत्न बज्राचार्यपाखें समिक्षा यानादीगु खः । ज्याझ्वःयात बागमती प्रदेशया पूर्व मन्त्री एवं काठमाडौं क्षेत्र नं ८ क या प्रदेश सांसद शैलेन्द्रमान बज्राचार्य, बौद्ध बिदुषी सुमती बज्राचार्य, धर्मोदय सभाया महासचिव सागरमान बज्राचार्य व विद्वान् राजेन्द्रमान बज्राचार्यपाखें थःथःगु नुगः खँ तयादीगु खः ।
ज्याझ्वलय् बिषय प्रस्तुतकर्ता सह प्रा. डा मंगेश बज्राचार्ययात मू पाहाँकथं वैज्ञानिक डा.ज्वाला बज्राचार्यपाखें सम्मानपत्र बिसें थःगु खँ नं तयादीगु खः । बिहारया थ्व महिनाय् दिवंगत जुयादीपिं नानीमैंया बज्राचार्य व बाबामैंया बज्राचार्यया नांम्ह दुर्गतिपरिशोधन पाठ नं याःगु खः ।