लः सुना वनेवं बुंगाःचाय् नाग साधना पुजा

किपू(नेपालभाषा टाइम्स)/ मल्लकालीन प्राचीन बुंगाःचाय् लः सुना वंगु धासें नाग साधना पुजा याःगु दु । किपू नगरपालिका २ वडा द्यःध्वाखास्थित न्याम्हासिमा परिसरय् च्वंगु मल्लकालीन प्राचीन ‘लक्ष्मी बुंगाः’चाय् लः सुना वनेवं जलजगे नाग साधना पुजा याःगु खः ।
वंगु मंगलवाः उगु बुंगाःचाय् लः सुना वंगुलिं हाकनं लः मुनेमा धइगु कामना यासें उकथं नाग साधना पुजा याःगु खः । द्यःध्वाखाया स्थानीय नाती महर्जनलिसें मेपिं ज्याथपिं जानाः जलजगे नाग साधना पुजा याःगु खः । स्थानीयययाकथं २०७२ सालया विनाशकारी तःभुखाय् लिपा बुंगाःचा जीर्ण जुया वंगु खःसा अनंलि बुंगाःचाय् बुलुहुं लः नं सुना वंगु खः । तःभुखाय् ब्वये न्ह्यःतक बुंगाःचाय् यथेष्ट मात्राय् लः जायाच्वनीगु व आपालं स्थानीयं उगु हे बुंगाःचाया लः त्वनेत नापं थीथी प्रयोजनया निंतिं छ्यलेगु याना वयाच्वंगु स्थानीयया धापू दु ।
किपू नगर दुने आपालं पुखू, बुंगाः व ल्वहंहिति तना वनेधुंकूगु व अज्याःगु गुलिखे सम्पदाय् किपू नगरपालिका, सहिद स्मारक कलेज, विष्णुदेवी अस्पताल लिसें निजी सम्पत्तिया संरचना निर्माण जुइधुकूगु दु । छुं छुं ल्वहंहिति व बुंगाःचाया अस्तित्व धाःसा आतक नं ल्यनाच्वंगु दनि ।
न्याम्हासिमा परिसरया लक्ष्मी बुंगाःचा किपू देय्या धार्मिक, सांस्कृतिक, ऐतिहासिक परम्परालिसे स्वनाच्वंगु दु । थुकथं थीथी महत्वया बुंगाःचाय् लः सुना वनेवं स्थानीय किपूमितय्‌सं दुःख तायेका हयाच्वंगु दु । लक्ष्मी बुंगाःचा किपूया ऐतिहासिक वीरंगनाकथं कयातःम्ह कीर्तिलक्ष्मीं ख्वाः सिलिगु व मेपिं मिसातय् मचा बुइ मफयाच्वंगु अवस्थाय् थ्व हे बुंगाःचाय् लः कायेके छ्वइगु प्रचलन दुगु स्थानीयतय् धापू दु ।
लक्ष्मी बुंगाःचाय् हाकनं लः मुना वयेमा धइगु कामना यासें जलजगे नाग साधना पूजा यानादीम्ह स्थानीय चिलंच्व महाविहारया पद्म वज्राचार्यं थनिं ५२ दँ न्ह्यःनं थथे हे लः सुना वनेवं जलजगे नाग साधना पुजा याःगु कनादिल ।