देय्न्यंकंया च्याम्ह जीवित कुमारीया पुजा

देय्न्यंकं विराजमान जीवित देवी कुमारीया दर्शन व पुजा यायेगु तातुनां ग्वसाः ग्वःगु जीवित कुमारी पुजा ११४० अन्तर्गत शनिवाः स्वनिगःया च्याम्ह जीवित कुमारीयात पुजा यायेगु ज्या क्वचाःगु दु ।

ह्यूमत मिसा पुचःया ग्वसाः, पुचःया नायः मचानानी महर्जनया संयोजकत्वय् स्वक्वःगु खुसिइ ग्वसाःग्वःगु ज्याझ्वलय् न्हापांगु ब्वः कथं येँया बसन्तपुरय् च्वनाबिज्याःम्ह राजकीय कुमारी, मखं कुमारी, किलाघः कुमारी, तोखा कुमारी, ख्वप कुमारी व यलया बुंगः कुमारी, यल कुमारी व आजीवन कुमारी यानाः च्याम्ह कुमारी पुजा यायेगु ज्या क्वचाःगु खः ।

येँ महानगरपालिकाया मेयर विद्यासुन्दर शाक्यया मू पाहाँसुइ न्ह्याःगु दर्शन व पुजा यायेगु ज्याझ्वलय् प्रमुख शाक्यं जीवित कुमारीपिंत लुमन्ति पौ लःल्हाना दर्शन यानादिल । ज्याझ्वलय् येँ महानगरपालिकाया उपप्रमुख हरिप्रभा खड्गी श्रेष्ठ, तोखा नगरपालिकाया मयेर प्रकाश अधिकारी, उप्रमुख ज्ञानमाया डंगोल, कामपा १२ वडाका वडाअध्यक्ष विकास डंगोल, कामपा १८ वडाका वडाअध्यक्ष न्हूछेकाजी महर्जन नापं विशिष्ट पाहाँपिनिगु ब्वति दुगु खः ।

न्हय्सःत्या भक्तजनतय्गु ब्वति दुगु ज्याझ्वलय् दर्शन व पुजा यायेत वःपिं भक्तजनतय्त कुमारी दुगु थासय् च्वंगु खलःपुचः, क्वल व संघसंस्थां तःजिक साँस्कृतिक रुपं लसकुस याःगु खः ।

जीवित देवी कुमारीया पुजाया तातुनाः येँया राजकीय कुमारीयात जक मखु देय्न्यंकं बिराजमान जुयाबिज्यापिं कुमारी माजुया प्रचारप्रसार यानाः इमित नं राज्यं सम्मान व भरणपोषण याकेगु व याकेत इनाप यायेगु प्रचारप्रसार संयोजक राजु नापितं जानकारी बियादिल । नापं वय्कलं थुगु अभियानं ८० बर्ष लिपा २०७० सालय् पनौतीइ लोप जुइधुंकूगु कुमारी संस्कृति पुनस्र्थापना यायेत ताःलाःगु जानकारी नं बियादिल ।

ह्युमत मिसा पुचलं जीवत देवी कुमारीया पुजा वि.सं. २०७० सालय् न्हापांगु खुसिइ, २०७३ सालय् निक्वःगु खुसिइ व २०७६ सालय् स्वक्वःगु खुसिइ ग्वसाःग्वःगु खः । पुचलं स्वक्वःगु खुसिइ जूगु कुमारी पुजा अन्तर्गत साँखु व पनौती फागुन ११ गते व नुवाकोटय् चैत्र २२ गते पुजा यायेगु जानकारी ब्यूगु दु ।

सम्बन्धित बुखँ

LEAVE YOUR COMMENTS