ओली–मोदीया साइडलाइन वार्ता अनिश्चित

येँ (नेपालभाषा टाइम्स)/ प्रधानमन्त्री केपी शर्मा ओली थौं चीन भ्रमणय् झायादीत्यंगु दु । प्रधानमन्त्री ओली म्हिगः प्रतिनिधिसभाय् सम्बोधन यासें थःगु चीन भ्रमणया बारे जानकारी बियादीगु खः ।
न्यान्हुया चीन भ्रमणय् झायादीत्यंम्ह प्रधानमन्त्री ओलीं चीनया तियानजिनय् ग्वसाः ग्वःगु सांघाइ सहयोग संगठन (एससीओ) शिखर सम्मेलनय् ब्वति कायेत वनीगु नेपाःया प्रतिनिधि मण्डलया नेतृत्व यानादी । वय्‌कलं थःगु भ्रमणया मू उद्देश्य एससीओ सम्मेलनय् नेपाःया दृष्टिकोण व प्राथमिकता न्ह्यब्वयेगु खँ धयादीगु दु ।
वय्‌कःया कथं भ्रमणया झ्वलय् चिनियाँ राष्ट्रपति सी जिनपिङ लिसें उपराष्ट्रपति हान चङ्ग लिसे नापलायेगु ज्याझ्वः दु ।
उकथं हे शिखर सम्मेलनया झ्वलय् थीथी देय्या राष्ट्र प्रमुख व सरकार प्रमख लिसे निगू पक्षीय व मेगु प्राथमिकताया विषययात कयाः सहलह जुइगु जानकारी नं बियादीगु दु ।
म्हिगः सम्बोधनया झ्वलय् प्रधानमन्त्री ओलीं भ्रमणं नेपाः–चीन मैत्रीपूर्ण सम्बन्ध थप सुदृढ जुइगु व अन्तर्राष्ट्रिय मञ्चय् नेपाःया अवधारणा, प्राथमिकता स्पष्ट रुपय् न्ह्यब्वयेफइगु विश्वास प्वंकादीगु दु ।
वय्‌कःया चीन भ्रमणया झ्वलय् भारतीय प्रधानमन्त्री लिसे साइड लाइन वार्ता जुइगु चर्चा नं जुयाच्वंगु खःसां म्हिगः थःगु सम्बोधनया झ्वलय् ओलीं मोदी नापलायेगु बारे छुं हे खँ न्ह्यथनामदी । भारत व चीन दथुइ लिपुलेक नाका चायेकाः व्यापार यायेगु धकाः जूगु सहमतिइ नेपालं आपत्ति प्वंकूगुलिं यानाः मोदीं ओलीयात नापलायेत आनाकानी याःगु आशंका कुटनीतिक क्षेत्रं याःगु दु ।
चीन भ्रमणया झ्वलय् ओलीं चीनया विजय परेडय् नं ब्वति काइगु व रुसी राष्ट्रपति भ्लादिमिर पुटिनलिसे खँल्हाबल्हा याइगु समाचार नं वयाच्वंगु दु ।