कवाड व्यवसायी लिसे वार्ता जुइ मखु

येँ (नेपालभाषा टाइम्स)/ येँ महानगरपालिकां कवाड व्यवसायी लिसें गुगुं नं कथंया सहलह मयाइगु खँ धाःगु दु । येँ महानगरपालिका नगर प्रहरी बलया प्रमुख राजुनाथ पाण्डें कवाड व्यवसायी लिसे वार्ता व सहमति मजुइगु खँ धाःगु खः ।
पाण्डें महानगरया कार्यपालिका बैठकं हे कवाड व्यवसाय चीकेगु निर्णय यानातःगु कारणं यानाः वार्ता व सहमति मजुइगु खँ धाःगु खः ।
वय्‌कलं कवाड व्यवसायीया आन्दोलनयात थःपिंसं सामान्य रुपं कयागु धासें न्ह्याक्व हे आन्दोलन याःसां नं वार्ता व सहमति मजुइगु खँ धाःगु खः । उकथं हे पाण्डें ल्यं दनिगु थासय् नं कवाड व्यवसाय चीकेगु ख्याच्वः बिसें धाःगु दु, ‘आः ल्यं दनिगु थासं नं कवाड व्यवसाय चीकेगु जुइ । आवासीय क्षेत्र बाहेक न्ह्याथाय् कवाड व्यवसाय याःसां नं छुं धयागु मदु । बस्ती क्षेत्रय् कवाड व्यवसाय चीकेगु हे जुइ ।’
वंगु सोमवाः निसें कवाड व्यवसायीतय्‌सं न्यागू बुँदाया माग न्ह्यब्वयाः येँ मनपाया ज्याकू न्ह्यःने धर्ना बीगु ज्या याना वयाच्वंगु दु । व्यवसायीतय्‌सं न्यागू बुँदे माग तसें थःपिनिगु व्यवसाय सुरक्षित यायेत संघीय सरकारं हस्तक्षेप यायेमाःगु माग नं याना वयाच्वंगु दु ।
कवाड व्यवसायीतय्‌सं संविधानं बिउगु पेसा व्यवसाय याये दइगु अधिकार ग्यारेन्टी जुइमाःगु व महागनरं गुण्डागर्दी शैलीं थःपिंत याःगु ज्यादती व व्यवसायीतय्‌त जूगु क्षतिया क्षतिपूर्ति बीमाःगु माग नं याना वयाच्वंगु दु ।
थ्व हे झ्वलय् म्हिगः नं कवाड व्यवसायीतय्‌सं येँ महानगरपालिकाया ज्याकुथी धर्ना बिउगु दु ।
भृकुटी मण्डपं न्ह्याःगु र्‍याली राष्ट्रिय सभा गृह, पुलांगु बसपार्क, त्रिचन्द्र कलेज जुयाः महानगरया ज्याकुथी थ्यनेवं ‘बालेन साह मुर्दावाद’, ‘गरिबतय्‌त यानाः नके बिउ’, ‘डोजर आतंक बन्द याः’, ‘ज्यादती बन्द याः’ धइगु नारा थ्वयेकूगु खः ।
व्यवसायीतय्‌सं थःपिनिगु मागयात सम्बोधन मयात धाःसा आन्दोलनयात अझ तच्वयेकेगु ख्याच्वः नं बिउगु दु ।